ZPM party-in AMC inthlana Candidate tur an puang

Zoram People's Movement (ZPM) party chuan nimin khan an pisaah Aizawl Municipal Corporation (AMC) inthlan awm tura an candidate turte an puang. Candidate tur puangtu ZPM president mawhphurhna chelh mektu K Sapdanga, vice president chuan, AMC-ah sorkarna siam ngei an tum thu a sawi.

ZPM Vice President chuan, ZPM chuan AMC thar din an tum tih sawiin, "ZPM hian kalphung thar, mipui sorkar tun din kan tum. Mizoramah politics ṭha hmanga ram rorelna ṭha tun din tuma beitute awm khawm kan ni. Sorkar ṭha siam turin, vote zawn dan aṭanga duhtui a ngai. Vote dil ṭhahnemngaih vanglai pawhin Setana làwm zawnga vote zawn loh hrâm kan tum dawn nia," a ti.

Pathianin ZPM chu a awmpui a nih a rin thu sawiin K Sapdanga chuan, "Pawl dangin min sêlna pawh 'Kohhran hi kan unit a ni an ti' tiin kan sawi loh pui min sawitir a. Ram rorel thei tura kan campaign-naah Pathian duh dan nia kan rin avangin ṭawngṭaia bul ṭan a, ṭawngṭaia hnu khâr kan duh ṭhin a, kan la inchhir lo," a ti a; ZPM campaigner-te chu an kalphung chu zâwm ṭheuh turin a ngen. 

Neutral-in an party chu an khawngaih sâwt hlea a hriat thu sawiin Sapdanga chuan, "Ni tinin sorkar ṭha tun din duhtu kan pung mawlh mawlh mai. Mi thar hmél an lo lan hian, lo awm hmasate hi kan ṭhat bik vang a ni lo, malsawmna kan dawn a ni; malsawmna hi kan hmu thiam lo palh ang tih hlauhawm. Hlawhtlinna hmelma hnai ber chu chapona a ni tih i hria ang u," a ti.

ZPM Vice President chuan, party hlun hoin an mi leh sate tihphûrna atan 'Fatu hlui (party worker-te) chu a buk bik ve bawk ang chu,' an ti ṭhin nia sawiin, "ZPM hi mipuite'n sorkar siam tura an hlâng kai a nih chuan, AMC-ah emaw, state sorkarah pawh ni se, fatu hlui hran a awm lo ang," a ti a; ZPM-in sorkarna an siam chuan mipuiin kîl hmasain, fatute chu ruaiin a daih loh pawhin an nghâk mai tur a nih thu a sawi.

Inkhawm hi ZPM vice president Lalthansanga'n a kaihruai a, Val Upa Council member Bualhranga'n AMC atana an party candidate-te chu rinawmna thu a tiamtir a, fuihna thu a sawi nghal.

.    ZPM chuan kalphung thar nei mipui sorkar, ram leh hnam damna sorkar, langtlang leh hlemhlêtna laka fihlim sorkar siam a tum tih hriain, candidate ka nih lai leh councillor ka nih hnuah pawh ZPM thuthlung leh election manifesto-a chuang zawng zawngte hre rengin leh vuan tlat chungin thil ka ti ṭhin ang.

.    Candidate ka nih laiin Mizoram People Forum (MPF) kaihhruaina leh Election Model Code of Conduct ka zâwm tlat ang. Thlan tlin ka nih chuan, ZPM candidate ka nih avangin ZPM-a thuneitute thu ka zâwm ang a, ka dinhmun atan an ruat apiang pawmin ka mawhphurhna chu rinawm takin ka hlen zel ang a, ZPM hransan (defect) lo turin ka intiam a ni.

.    Nomination ka file ruala sum leh pai leh thil hlu dang ka ziahna (Declaration of Assets) ka thehluh chu ZPM General Headquarters-ah ka thehlut ang a, hei hi hlemhletnaa inhnamhnawiha rinhlelh leh puh ka nih thulhah leh ṭul danga hman ka remti e.

.    Chhung leh khat, mahni mi leh sa leh mi dang tute pawh duhsak bikna lakah ka inthiar fihlim ang.

.    Eng dinhmunah pawh ding ila, danin hamṭhatna min pek chhungah ka nung ang a, ka dinhmun avanga hamṭhatna leh hlâwkna siam chawp theih thil dang reng rengah ka inhnamhnawih lo ang.