KHAWTHLIR

Mizoram Governor PS Sreedharan Pillai chuan nimin khan Mizoram Legislative Assembly pariatna session vawi sarihna chu February 23, 2020, chawhma dar 10:30 aṭanga neih turin a ko. Session programme kimchang chu Speaker kaihhruai Bussiness Advisory Committee-in an la ngaihtuah ang.

Land Revenue & Settlement (LRS) department chuan chhiah ni lo, fee dangte awlsam zawka pek dan an ruahman. January 2021 aṭangin LRS Directorate-ah credit card/debit card hmangin non-tax payment (fee hrang hrang, chhiah ni lo ho) - LSC fee (land recording fee), hming thlak, LSC ṭhen darh, mortgage, etc. ti turin cash counter/reception counter-ah pek theih a ni tawh a; credit card/ debit card keng lo tan pawisa faia pek theih zel tho a ni bawk. 

Peoples' Conference (PC) party hruaitute nimina an pisaa an president Lalhmangaiha Sailo hoa ṭhukhawm chuan, Serchhip biala Assembly by-election awm turah candidate siam an rêl a, "Aizawl Municipal Corporation leh Serchhip by-election kan hmabakah hripui boruak thlir chungin campaign beihpui thlak ni se," an ti. 

State Referral Hospital-ah nimin khan Covid-19 vei mi pakhat dah luh a ni a, rinhlelh thilah mi pahnih dah luh a ni bawk. SRH-ZMC Bulletin tarlan danin, SRH-ah hian Covid-19 vei mi 11 awm mekin, Isolation ward-ah enkawl vek an ni a, an zinga pahnih chu oxygen pek mek an ni. Nimin khan hripui laka fihlim tawh mi pakhat chhuahtir a ni thung.

'Beiseina nen' tih film, C Lalenga buatsaih chu nimin khan Mizoram Journalists Association (MJA) president Zonunsanga Khiangte-in Commerce & Industries conference hall-ah a tlangzarh. Film hi CD-ah siam niin, pakhat Rs. 500-in lei theih a ni.