Lockdown laiin Lehkhabu 150 a chhuak

Synod Bookroom chuan  an chhinchhiah danin, kum 2020 khan December thla thlengin Mizo ṭawng lehkhabu 150 a chhuakah an ngai a, an inkaihruaina vanga lâk remchang lo lehkhabu pahnih/khat a awm a; kum dang aiin nikumah lehkhabu chhuak thar a tam zawkin an hria.

Synod Bookroom manager Lalniliana hnen aṭanga thu dawn danin, Synod Bookroom-in an chhinchhiah dan chuan, kum 2020 chhunga lehkhabu an lâk dan aṭangin November thlaah lehkhabu a chhuak tam ber a, lehkhabu 22 a chhuak a, April thlaah a chhuak lo thung.

Kum 2020 chhunga lehkhabu chhuakte an chhinchhiah dan chuan, January thlaah lehkhabu 21, February-ah pasarih, March-ah pakua, May-ah pariat, June-ah pasarih, July-ah 22, August-ah 10, September-ah 10, October-ah 15, November 22 leh December-ah 17 a chhuak a ni.

Lalniliana chuan, nikum chhunga lehkhabu chhuakte chu Synod Bookroom-in an la deuh vek tih a sawi rualin, an inkaihhruaina aṭanga lâk rem loh pahnih/khat a awm thu a sawi a; kum danga lehkhabu an lâk dan aṭanga an chhûtin, lehkhabu 120/130 vel a chhuak ṭhin niin an chhinchhiah a, nikuma inkhàrkhip lai khan kum dang aiin lehkhabu a chhuak tam zawkah an ngai tih a sawi a ni.

Covid-19 inkhârkhip avangin Synod Bookroom hrang hrangte ni eng emaw zat hawn theih ni lo mah se, lehkhabu an hralh ṭha thawkhat tih sawiin Lalniliana chuan, "Lockdown laiin lehkhabu pangngai kan hralh chhe chuang lo," a ti.