ACB IO-te tan intuaihriamna buatsaih

Chief secretary Lal­nunmawia Chuaungo, chief vigilance officer (CVO) ni bawk chuan nimin khan Anti Corrup­tion Bureau (ACB) conference hall-ah ACB-a thawk investiga­ting officer-te tana intuaihriamna Refresher Course a hawng.

Lalnunmawia Chuau­ngo chuan, hlemhlêtna (corruption) chu thil thar a nih loh thu sawiin, "Mihringte'n tun hma aṭanga kan chênpui reng a ni a, chuti chungin engti zawng maha sawi mawi emaw, sawi nêp chî emaw a ni lo," a ti a; hlemhlêtna a hluar zel lohna tura hmalak chu tihmâkmawh a nih thu a sawi.

Ram rethei leh mipui rah behna a nasatna ramah hlemhlêtna a hluar ṭhin tih sawiin Lalnunmawia chuan, "Chutiang ramah chuan hmasawnna a ṭhuanawp a, mipui chan tur mi tlemtêin an insem ṭhin. Dan felfai neih loh te, kalphung neih ṭhat loh avangtein hlemhlêtna hi a pung ṭhin a ni," a ti.

Chief Vigilance Officer chuan, ACB chu mipui ṭhatna leh hlâwkna tura thawk nia a hriat thu sawiin, "ACB-in pawi­mawhna lian tak in nei. Mizoramin Lokayukta kan neih chinah ACB nen hnai takin kan thawkho a, Lokayukta hnenah ACB-in case eng emaw zat a pe tawh a, hun lo kal zelah pawh kan thawhhona a phuisui zel kan beisei," a ti a; investigating officer-te chu intuai hriam zel turin a fuih. 

ACB investigating officer-te tana intuai­hriamnaah hian Dr Vanlalthlana, MLA leh Mizoram police leh department hrang hrang aṭanga mithiamte'n kar khat chhung thil pawimawhte an zirtir dawn a ni.