Sorkar chungah NTUM an lawm 'Thlarau MR' thâwm hriat tur a la awm

Council of Minister-in sorkara muster roll (MR)-a thawkte enkawl dan tur rawtna 'Enhancement of the quota prescribe for promotion to the post of LDC from Group D staff' a pawm avangin National Trade Union of Mizoram (NTUM) hruaitute chuan Mizoram sorkar chungah an lawm thu an sawi. 'Thlarau MR' an tih mai, mihring awm lo, MR-a thawk anga hlawh la tho si an la awm thu an sawi bawk.

NTUM hruaitute hian nimin khan Aizawl Press Club-a thuthar thehdarhtute an kâwm a; NTUM president C Remtluanga chuan, MR-te chawi kânna tura dinhmun awmze nei 'Provisional employee' tih Mizoram sorkarin a pek avanga an lawm thu sawiin, "Tunah chuan MR-te hi ran chhawra chhawr ang mai an ni dawn ta lo. Dan tharin tuna nihna min pek ang hi tun hmain a la awm ngai lo. Kan dil a, kan dil angin min pe a, kan lawm hle a ni," a ti.

C Remtluanga chuan zawhna chhangin, thlarau MR thâwm hriat an la neih thu a sawi a, "Kan la buaipui rih lo a, bank account aṭangin hlawh lâk ni mah se, a mihring awm lo, mi ID hmanga hotute'n hlawh an laksak hriat kan la nei," a ti a; thuthar thehdarhtute chu thlarau MR zawn chhuahpuiah a sáwm nghal.

MR employee-te chu provisional employee nihna pek an nih tawh dawn avangin NTUM hnuaiah an awm a rem dawn tawh loh thu NTUM President chuan a sawi a, "Tuna kan thil tum chu MR-te aia chan chhe zawk, private school, damdawi-in leh thil danga thawkte tan Labour Law hman a nih theih nan hma kan la chhunzawm ang," a ti.