Road Safety Month hman ṭan a ni

Nimin khan Mizoram­ah Road Safety Month hman ṭan a ni a, khawpui hrang hrangah hawn a ni. Aizawlah chuan Tran­sport minister TJ Lal­nuntluanga'n Transport directorate confe­rence hall-ah a hawng.

Road Safety Month hi February 17, 2021 thleng hman tur a ni a, thupui chu 'Fimkhur la, nun humhim rawh' tih a ni. A hawnna inkhawmah minister TJ Lalnuntluanga chuan, kum dang ang loin, kuminah chuan thla khat chhung hman a ni dawn tih a sawi.

TJ Lalnuntluanga chuan, Road Safety Month chhungin traffic police-te nen ṭanghoin dan bawhchhiate lakah ngaihhnathiamna awm lo, ‘No Tolerance Week’ buatsaih a ni tawh ṭhin tih a sawi a, "Tun kumah chuan Vanapa Hall kawtah ‘Help and Guidance Desk’ buatsaih a ni ang," a ti.

Transport Minister chuan, lirtheia chetsualna thleng ṭhin chungchangah mi tinin pawimawhna an nei tih sawiin, "Fimkhur chung pawhin mi dang tihsualah accident kan tâwk thei reng a ni tih hre reng chungin awareness kalpui hi kan tihmâkmawh a ni," a ti a; mi tin an fimkhur a ṭul thu a sawi.

Kumina Road Safety Month thupui ‘Fimkhur la, nun humhim rawh’ tih chu hriat nawn fo a ngai tih sawiin TJ Lalnuntluanga chuan, "Fimkhurna hian nun himna a keng tel a, pawlawh taka lirthei khalh te, rûi chunga khalh te, dan phalna nei loa khalh te, lirthei fit lo khalhte hi chetsualna thlen ṭhintu a ni,'' a ti a; document fel loa lirthei khalhte chu ram dan zah lohna a nih thu a sawi. 

Hawnna inkhawma tarlan danin, sorkar chhin­chhiahnaah Sep­tem­ber 2020 thleng khan Mizoramah lirtheia chet­sualna 58 a thleng a, mi 27 an thih phah a ni. 

Nimin khan Mizoramah Road Safety Month hman ṭan a ni a, Aizawl bakah district khawpui hrang hrangah a hawnna inkhawm buatsaih a ni.

Road Safety Month pual hian hmun ṭhenkhatah chuan mipui zirtirna atan banner târ a ni a, lirthei zuar (dealer)-te pawhin an dawrah an tár hlawm. Zirna-in hawn hunah kawngpuia himna tura intiamna (road safety pledge) nei tura hmalak a nih bakah, thuchah tawi puang turin village council leh local council-te ngen an ni ang.

Road Safety Month hi Lungleiah chuan additional DC R Vanrengpuia'n Lunglei DTO pisaah a hawng a; Lunglei SP Stephen Lalrinawma leh official dang te, Lungleia Zoram Drivers Union (ZDU), driver pawl hrang hrang leh tlawmngai pawl hruaitute leh chanchinbumite an tel.

Inkhawma tarlan danin, Lunglei district-ah kum 2020 chhung khan lirtheia chetsualna avangin mi pakua an thi a, mi 10 an hliam. Lirthei dan bawhchhiate sum chawi tling khawm chu Rs. 5,41,500 a ni.

Lunglei district-ah hian National Highways and Infrastructure Development Corporation Limited (NHIDCL) nen ṭang dunin January 2020 chhungin Lunglei ṭhalaite tan Road Safety Rally buatsaih tum a ni.

Champhaiah chuan DC conference hall-ah additional DC R Lalnghakliana'n a hawng a; MVI-a an hotu R Lalhruaitluanga kaihhruaiin kal khawmte'n Month pualin thutiam an chham.

Road Safety Month hman chhungin enforcement leh MVI-te'n khauh lehzualin lirthei an endik dawn a, dan zâwm lote chu hrem zel tum a ni. Lirthei khalhtu leh mipui hnenah zirtirna a theih anga zau leh remchang ang zela kalpui tum a ni bawk.

Kolasib bawrhsap Dr H Lalthlangliana'n DC conference hall-ah Road Safety Month a hawng a; district transport officer (DTO) C Lalawmpuii, sorkar department hrang hranga hotu te, khawtlang hruaitu te, Kolasib Truck Driver Association leh lirthei zuara sumdawngte an tel.

Kum 2019 chhung khan Kolasib district-ah lirtheia chetsualna ṭum ruk thlengin, mi pathum an thih phah a; kum 2020 chhung khan lirthei chetsualna ṭum riat thlengin, chung zinga ṭum rukah chuan mitthi an awm a ni.

Road Safety Month hi Serchhipah chuan additional DC Lalmuansanga Ralte-in DC conference hall-ah a hawng a; additional SP PC Lalṭanpuia'n traffic rules leh MVI hotu Lalrohlua'n lirthei insurance leh motor accident claim dan an sawifiah. Hawnna inkhawm hi district transport officer Lalengthanga Hnamte-in a kaihruai a ni.

Lawngtlaiah chuan Bazar Venga Areopagy-ah hawnna inkhawm buiatsaih niin, district bawrhsap Dr Andrew H Vanlaldika'n a hawng a; Road Safety Month chhungin Lawngtlaiah sumdawnna lirthei khalhtu ṭha ber (best driver) leh traffic police thawk ṭha ber thlan a ni ang.

Lawngtlai district-ah hian kum 2020 chhung khan lirthei thar 902 chhinchhiah a ni a, kuminah January 15, 2021 thlengin lirthei 72 chhinchhiah a ni tawh. Tun thlenga Lawngtlai DTO-a lirthei ziah luh tawh zat chu 7,396 a ni.

Mamitah chuan DC conference hall-ah additional DC  R Vanlalsawta'n Road Safety Month a hawng. Hawnna inkhawmah hian DTO B Lalchuangkima, Lawngtlai SP, PWD executive engineer, chief medical officer, IPRO, Excise & Narcotics assistant commissioner, DEO, Joint VCP, Taxi Drivers Association, Mamit Maxicab Welfare, Mamit Truck Drivers Association leh thu thar thehdarhtute an tel a ni.