Periodic patta dil chhan sawifiah

Kawnpui notified town area huam chhunga NH-306 New Diversion-in a tihchhiatsak tura ram neitu periodic patta diltute chuan nimin khan Kolasib Press Club-ah thuthar thehdarhtute an kâwm a, periodic patta an dil chhan an sawifiah.

Ram neitute zinga mi R Malsawmthanga chuan, Kawnpui area-a ram neitute aiawha thuthar thehdarhtute kâwm an nih thu sawiin, "Tun hnaiah Bilkhawthlirah seal leh signature lema periodic patta dilna luh thute media kaltlangin kan lo hria a ni. Chu chuan mi tam zawk ngaihdanah verther taka thil ti rû angin min ngai thei maiin kan ring a, chuvangin sawifiah a ngai niin kan hria," a ti.

R Malsawmthanga chuan, NH laih zauh tum a nih thu kum 5 hma lam aṭangin mi sawi an hre tawh tih sawiin, "Mahse, khawi laiah nge laih zauh tur tih leh eng hunah nge laih tur tih kan hre phâk lo," a ti a; chincháng hre loa an awm laiin sorkar (Revenue department)-in May 27, 2020-ah National Highway Act, 1956 a puan avangin pass dil zui theih a nih tâk loh thu a sawi.

National Highway Act, 1956 puan a nih hnuah pawh an ram chu tihchhiat tur a nih leh nih loh an hriat loh thu sawiin Malsawmthanga chuan, "Kolasib DC-in a kaihhnawih khua VCP-te ko khawmin a sawipui tawh a, mahse, tute ram nge chhe tel dawn tih sawi lan a awm lo. NHIDCL-in kawngpui laih thar tur chin zelah chhinchhiahna an phun hnuah kan hre chauh a ni," a ti.

R Malsawmthanga chuan, Kawnpui town chhungah chuan ram neitu dik tak lo periodic patta díl an awm thu an hriat loh thu sawiin, "Tuna hming list kan neihte pawh hi uluk takin kan ennawn fo a, ram nei ve lo, compensation beisei vang ringawta revenue pass dilna thehlut ve ṭhin hmun danga an sawi ang hi an awm lo," a ti a; Kawnpuia VC-te chuan mi dik lo inrawlh an awm hlauin an vên nasat thu an sawi.

NH zauh turah zangna­dawmna atan cheng vbc. 1500 sorkar laipuiin a ruahman nia an hriat thu sawiin R Malsawmthanga chuan, "Tun dinhmunah chuan cheng vbc. 300 vel bâk senso tur a awm lo mai thei an ti. Kum tam tak chhung kan lo enkawl tawh hi pawisa tlemtê nena inthleng kan remti lo. Periodic patta kan dil dan hi dan bawhchhiatna a nih leh nih loh kan hre pha lo a, kan dil ve tawp zawk a ni," a ti.

Periodic patte diltute sawi danin, periodic patta diltu address ziahnaah Aizawl leh khaw dang mi lang telte chu Kawnpuia mimal ram an lo leisak tawh te, tun hma aṭanga an lo enkawl ṭhin - anmahni tak chu khaw danga pém chhuak tawh te, pi leh pute ram neih sa, an tu leh fate'n an inchan semte a awm. Ram neitu dik tak angin an ngai a ni.