



Aizawl chhehvelah phalna nei loa din hotel leh stone crusher a awm nual
Mizoram Pollution Control Board (MPCB) chuan nimin khan Aizawl leh a chhehvêla hotel leh stone crusher awmte sawi lâwk loin an endik a; phalna nei loa din hotel leh stone crusher a awm nual tih an tarlang.
Surprise checking ti tur hian MPCB member secretary V Lalengmawia hoin an thawk chhuak a, Aizawl leh a chhehvêla hotel leh stone crusher eng emaw zat endik a ni. Hotel leh stone crusher te chu phalna neia din a nih leh nih loh te, dân an zawm leh zawm loh te, khawtlâng leh mipui tan a him leh him loh te, bawlhhlawh leh thli nâwite dân ang taka sâwngbâwl a nih leh nih loh te endik a ni.
Endik zingah phalna nei loa din hotel leh stone crusher a awm nual tih MPCB chuan an tarlang a, "Vantlang tana hnawksak leh dân zâwm ṭha lo leh hrisêlna atana pawi thei tur ang chite pawh a awm nual. MPCB chuan khauh zawka hma lain, surprise checking neih zel a tum," an ti.
MPCB tarlan danin, hotel, stone crusher leh industry lam thil din tur rêng rêngin MPCB-ah phalna (consent) an la hmasa tur a ni a, phalna nei loa lo din tawhte pawhin phalna an la leh tur a ni. Dânin a phût angin environment tichhe lo zâwngin hma an la tur a ni bawk.