KHAWTHLIR

X-ray khawl pe

Adviser to chief minister Dr Lorrain Lalpekliana Chinzah, MLA chuan nimin khan a bial Lawngtlai East-a Sangau Primary Health Centre (PHC) hnenah X-ray khawl a pe. Dr Lorrain Lalpekliana chuan, Sangau PHC-in mamawh dang a neihte pawh a tahtawla ngaihtuah zel a nih dawn thu a sawi a, "Doctor leh staff nurse indaih lohna pawh ngaihtuah mek a ni," a ti a; x-ray film siamna tur chah mek a ni a, technician chu MLA fund aṭanga rawih a nih tur thu a sawi.

Quiz intihsiak

Lunglei leh Khawzawlah nimin khan district level Quiz Competition on Electoral Awareness buatsaih a ni a; Lunglei district-ah Lungsen HSS leh Khawzawl district-ah Far East Experimental School te pakhatna an ni. Intihsiakah hian electoral roll siam dan te, EVM leh VVPAT chungchang te, inthlan kalpui dan leh vote chhiar dan te, inthlan kaihhnawiha hriat tur hrang hrang leh tunlaia thil thleng behchhante hmangin zawhna siam a ni.

Dawng tur thlang

Champhai leh Hnahthiala District Committee for the Implementation of National Social Assistance Programme chuan nimin khan National Family Benefit Scheme (NFBS) 2025-26 dawng tur an thlang a; Champhaiah mi 13 leh Hnahthialah mi 12 thlan a ni. NFBS hi chhungkuaa eizawngtu ber a thiha sorkar aṭanga ṭanpuina niin, BPL chhungkuate tan a ni a, Rs 20,000 dawn theih a ni.

Trainer training

Chhiarpui (Census of India) 2027 Phase-II neih turah nimin khan Lunglei DC conference hall-ah Lunglei, Siaha, Lawngtlai leh Hnahthial district-a field trainer-te pualin training ṭan a ni. Training-ah hian field trainer 28 an tel a, training hi naktukah chhunzawma zawh a ni ang.

Joint Mobile Court

Chief Commissioner for Persons with Disabilities leh State Commissioner for Persons with Disabilities te chuan nimin khan Chaltlanga Zo Hall-ah Joint Mobile Court atana official-te tan training an buatsaih. Vawiin hian Joint Mobile Court neih a ni dawn a, rualban lohna leh a kaihhnawiha lungawi lohna neite tan thu thlen theih a ni dawn a; zualkonate chu a hmunah chinfel a ni ang.