Keimah ang MLA 41 an awm tawh; Hremna tâwk awm chhun ka ni - Duhoma

ZPM leader Lalduhoma chuan, Mizoramah amah anga independent MLA 41 an awm tawh thu a sawi a, "Mi dangte chu hrem an ni lo a, keimah chauh heti hian hremna tâwk ka ni," a ti.

Lalduhoma hian nimin khan Lungleia ZPM Southern Headquarters pisa a hawnnaah thu sawiin, "MLA aṭanga min bàn chhan nia sawi, min thlang tlingtute phatsan tih hi chu mi tu pawh mai tan awih a har. ZPM chief ministerial candidate hial ka nih avangin ka ZPM-zia chu sawi nawn ngai lo tur a ni," a ti a; amah hêktu MLA 12 lai an ni chuan thil an ruahman lâwkna vek a ni tih a tihlan thu a sawi.

MLA aṭanga bàn a nih chuan court-a kal ngei turah an ngaih nghal a rin thu sawiin Lalduhoma chuan, "Court-a kan kal chuan MLA 12-in an theih dan danin tihkhawtlai an tum ngei dawnin a hriat. Court-a ngaihtuah chhung nen hun a rei lutuk dawnin kan hria a, chu ai chuan mipui court-ah kal zawk mai ila tiin Serchhip biala mipuite kutah kan innghat ta a ni," a ti.

ZPM Leader chuan, by-election neih a nih dawn avangin campaign-na tur sum leh pái an dawn mawlh mawlh thu sawiin, "Pathian min hruai dan hi chhût thiam phâk loh khawpin a ropui. Kan party tan ngei pawh malsawmna a ni tih hriat turin hmun hrang hrangah ZPM zawm thar an awm reng. Pathian hnena lawmthu sawi mai loh chu tih tur kan nei lo," a ti.

Lalduhoma chuan, chhim lam bial aiawha mipuiin MLA an thlan chhuahte'n chhim lam hmasawnna an ngaihthah tlat ṭhina a hriat thu sawiin, "Hei hi ngaihtuah ngai tak a ni. Central aṭanga development rawn kal tam tak hi chhim lam hian in chang ve ngai lo em ni a tih theih hial. Congress MLA Pu Zodintluanga'n RTPCR kháwl a pek vawiin thlenga hman loha an la dah mai maite hi a chhan hriat a châkawm a ni," a ti.

ZPM Southern Hqrs. president C Lalhmingliana pawhin thu sawiin, ZPM-in nasa takin hma an sâwn thu a sawi a, "Hmun hrang hrang aṭangin report lawmawm kan dawng mawlh mawlh reng," tiin, neutral leh party hrang hrang aṭangin ZPM zawm duhtu an awm reng thu a sawi.

ZPM thuchhuah tarlan danin, Lalduhoma hian nimin khan ZPM-ah mi 574 a lawm lut a ni.