AR sipai 44-te Governor's Medal hlan

Assam Rifles Inspector General (East) buatsaihin nimin khan Lok Bhavan-ah Assam Rifles Investiture Ceremony buatsaih a ni a; Larsap Gen. Dr Vijay Kumar Singh-a'n AR sipai zinga hna thawk ṭha zual thlan chhuah mi 44 hnenah chawimawina Governor's Gold Medal 26 leh Silver Medal 18 a hlan.

Gen. VK Singh chuan, Governor's Medal dawngtute chu ram tana an inpekna ngaihhlutna a nih thu leh a lawmpui thu sawi a, "Investiture ceremony hmanga AR thawk ṭhate chawimawina hi thil satliah a ni lo a, sipaite phûrna nasa zawk pek nan ruahman a ni," a ti a; medal dawngtute'n chona ṭha taka an hmachhawn tawh ṭhin angin, hma lam huna chona awmte pawh ṭha zawka hmachhawn leh ngei turin a fuih.

AR-te chu India hmarchhak bialin hun harsa a paltlang laia ram rawngbawlnaa hmingṭha, mipui nen pawh ṭha taka thawk ṭhin an nih thu sawiin Larsap chuan, "Indo-Myanmar ramri vên leh India ram tana buaina lian tak, ruihhlo tawlh beih let kawnga in hmalaknate a fakawm," a ti.

Buaina a la pun zel dawn avangin India ram himna leh ram tana ṭha turin theihtawp chhuah zel tur te, an kalna apiangah India hnam puanzar chawisangtu leh AR tihmingṭhatu ni zel turin Larsap chuan AR sipaite a chah bawk.

AR Investiture Ceremony-ah hian AR deputy inspector general (East) Brig. V Vidya Shankar, AR 23 Sector DIG Brig. Puspendar Sorayan leh officer dangte an tel a ni.