Tlawva Small Hydel Project peih tawh; Tui tlem avangin hman theih a la ni lo

South Khawbung RD block huam chhunga Tlawva lui aṭanga kawlphetha siamna tur, Tlawva Small Hydel Project (SHP) chu a taka hman theih turin a khâwl peih ni tawh mah se, a mamawh ang tui a awm rih loh avangin hman a la ni lo.

Vanglaini palai zawhna chhangin Power & Electricity department executive engineer R Lalrinkima chuan, Tlawva SHP chu hman theiha peih a nih tawh thu a sawi a, "Nikum fûr tàwp lamah khan kháwl pawh test dan hrang hrangin kan test zo tawh a, full load pe tura tui a tam tâwk loh avangin November 2020 thla tàwp lam khan khawl test hna kan chawlhsan rih," a ti.

R Lalrinkima chuan, kháwl chu hman theihin peih tawh mah se, P&E department kutah a la awm loh thu sawiin, "Contractor leh department inremna angin megawatt 5 chhum lo chat loa darkar 700 chhung a pek theih hnuah chauh contractor-in khawl hi department-ah a hlân ang. Chutiang ti tur chuan fûr tui tam hun kan nghak a ni," a ti a; project hawnna tura hna thawh ngai chu zawh vek a nih tawh thu a sawi.

Tlawva Small Hydel Project hi cheng vbc 73.40 hmangin Nortech Power Project, Kolkata-in an siam a, kawlphetha megawatt 2.50 siam thei khawl pahnih neiin, a vaiin megawatt 5 pe chhuak thei tura siam a ni.