Minister-in kawng zauh dan tur enfiah

Siaha bialtu MLA Dr K Beichhua, minister of state chuan nimin zing khan Siaha khawpui chhunga kawngpui zím lai zauh dan tur a enfiah. Kawngpui zauhna atan DPR siam nghal turin PWD Siaha Division hotute a hrilh nghal.

K Beichhua chuan, duhthusam ringawt ngaihtuah hman a ni tawh lo tih sawiin, "A bawha kan bawhzui rawk rawk a ngai tawh. Siaha khawpui internal road zím zual lai tizau tur pawhin kan bawhzui rawk rawk ang. Sorkarah kawngpui tihzauna tur fund kan díl chhuak thei lo a nih pawhin, kan MLA fund leh Siaha khawpui mipui ṭang rualin, kan job card aṭang talin tih dan kan ngaihtuah dawn a ni," a ti.

Dr K Beichhua hian a in hmun, damdawi-in leh Circuit House inkar kawng kual lai taka awm chu PWD hotute hnenah kawng kual lai tihzauhna atan an duh chen chen la turin a hrilh a ni. Siaha bialtu MLA hi MDC, Joint VC, DC, SP leh head of office-te'n an ṭawiawm a ni.