

Aizawl Western Bypass Road endik; Endiktute'n hna a chak tawk lo an ti
Special Monitoring Committee on Aizawl Bypass Road on the Western Side chuan nimin khan an chairman TBC Lalvenchhunga, adviser to CM hoin Aizawl Western Bypass Road sial mek tlawhin an endik. TBC Lalvenchhunga, MLA chuan, kawng siam tawh chin chu ṭha an tih rualin, hna a chak tâwk lo nia an hriat thu a sawi.
Sorkar thuchhuah tarlan danin, Aizawl West Bypass Road siamna atan hian Ministry of DoNER hnuaia PM DevINE aṭangin cheng vbc 500 hmuh hmuh a ni a, February 10, 2024 khan sorkar laipuiin a pe. Kawng hi km 45-a thui tur a ni a, Planning & Programme Implementation department chu nodal department niin, Mizoram PWD chu implementing leh executing agency a ni.
Kawng siamtu tur contractor RG Buildwell, Ghaziabad, Uttar Pradesh hnenah December 2024 khan hna pek a ni a, January 2025-ah hna thawk ṭanin, engineering, procurement & construction (EPC) mode-a thawh a ni. Tun dinhmunah hna thawh tur aṭanga thawh tawh zat (physical progress) chu 33.61% a ni a, contractor hnena sum pek tawh zat (financial progress) chu 31.49% a ni.
TBC Lalvenchhunga chuan, kawng sial hna chu a tir aṭangin an enpui reng thu sawiin, "Hna a lian tham a, department hrang hrang thawhho a ngaih avangin sorkarin Special Monitoring Committee a din. Tuna thawh tawh chin hi a lawmawm rualin, duh angin hna a kal chak tawk lo niin kan hria," a ti.
Adviser to CM chuan, duh anga hna a chak tâwk loh chhan ber chu contractor-in hmanrua an chhawp tam tawk loh vang a nih thu sawiin, "Contractor hi a chak thei ang bera hma la tura hrilh a ni tawh," a ti a; project enkawltu PWD-a Project Implementation Unit chu ngawrh lehzuala endik turin a chah.