
Training lo zirtirtute increment tihtawp hun a la thleng thei - Education Minister
Association of Mizoram DIET Employees (AMDE) chuan nimin khan Aizawl DIET Auditorium-ah General Conference vawi 7-na an hmang a; khuallian Education minister Dr Vanlalthlana chuan, zirtirtu training lo chu an increment tihtawpsak hun a la thlen theih thu a sawi.
Education Minister chuan, zirtirtute tana training an ngai pawimawh zel dawn tih a sawi a, "Training lo chu an increment tihtawpsak thlenga kal hunte pawh a la thleng maithei. DIET-te hi zirtirtute training petu an nih angin in pawimawh telh telh dawn a ni," a ti.
DIET-a thawkte service a ṭhat theih nan theihtawp an chhuah dawn tih sawiin Dr Vanlalthlana chuan, "Zirtirtute zirtirtu in nih avangin in mawhphurhna a sang a, zirtirna kan pekin practical a tam thei ang ber kalpui a pawimawh," a ti a; DIET-in research lama hma an lakna chu fakawm a tih thu leh sorkar pawhin a hman ṭangkai a beisei thu a sawi bawk.
DIET-a thawkte inkhawmpui hi AMDE president Christina Lathansangi’n a kaihruai a; Education Minister-in DIET-a zir chhuakte dinhmun zirchianna ‘Research’ a tlangzarh. Khualzahawm Prof. Lalbiakdiki Hnamte, Mizoram Education Reforms Committee (MERC) chairman pawhin thu sawiin, ITEP atan DIET-te buatsaih turin rilru an sen mek thu a sawi.
AMDE hi Mizorama DIET pariata thawkte intêl khawmna a ni a; DIET pariatah hian Diploma in Elementary Education (D.El.Ed) zir theih niin, Aizawl leh Lunglei DIET bikah BEd zir theih a ni.