KHAWTHLIR

Central Jail tlawh

Mizoram State Human Rights Commission (MSHRC) chairperson Justice Marli Vankung leh member-te chuan nimin khan Central Womens’ Prison & Correctional Home (Central Jail) an tlawh. MSHCS hian tángte kàwmin, mihring dikna chanvo (human right) bawhchhiat a nih leh nih loh te, tângte enkawl an nih dante an enfiah nghal a ni.

Thisen pe

Synod Higher Secondary School chuan nimin khan an sikulah thisen pek rûnpui huaihawtin, Civil Hospital, Aizawl tan thisen unit 67 an pe a, petute hi Science zirlai mipa 42 leh hmeichhia 25 an ni. Synod HSS hian November 11, 2026 khan thisen pek an lo huaihawt tawh bawk a, Arts zirlaite'n Civil Hospital tan thisen unit 146 an lo pe tawh a ni.

CD ratio 104.65%

Lawngtlai District Consultative Committee, District Level Review Committee leh District Level Security Committee chu nimin khan district bawrhsap Donny Lalruatsanga kaihhruaiin an ṭhukhawm. Financial year 2026-27-a second quarter July-September 2026 chhung khan Lawngtlai district-a bank-te CD ratio chu 104.65% a nih thu leh CD ratio nei sang ber district an nih thu tarlan a ni.

Ruihhlo do sawiho

Lawngtlai District Committee on Ruihhlo Do & Operation Jericho chu nimin khan district bawrhsap Donny Lalruatsanga hoin an ṭhukhawm a; January 2027 aṭangin Operation Jericho 2.0 kalpui a nih theih nan ṭul leh pawimawhte sorkarah thlen an rel. Hunpui thleng turah uluk leh khauh zawka duty leh checking kalpui ni se, Lawngtlai khaw chhunga damdawi dawrte December chawlhkar khatna chhungin endik ni se an ti.

UPC (NEI) zirlaibu

UPC-NEI Sunday School department buatsaih kum 2027 Puitling Sunday School zirlaibu 'Matthaia ziak hrilhfiahna' chu November 18, Nilaini zan khan general superintendent Rev. Zohmingthanzama'n UPC-NEI pisa, Mualpuiah a tlangzarh. Zirlaibu hi Rs 150 man a ni.