COVID-19: Mizoram dinhmun Fihlîm tawh chhuahtir zat 98.08%

January 17, Pathianni khan Mizoramah Covid-19 vei mi pakhat chiah hmuh chhuah a ni a; nimin khan hripui laka fihlîm tawh mi panga an chhuak thung. Mizoramah Covid-19 vei hmuh tawh mi 4,323 zinga mi 4,240 (00.00%) an chhuak tawh.

Covid-19 vei Pathian­nia hmuh chhuah awm­chhun chu Rapid Antigen Test (RAT) hmanga Aizawla hmuh chhuah a ni a; Nisapui khuaa hmeichhia kum 32 mi, Aizawla damdawi-in pakhata nau nei tura a kalnaah hripui vei a ni tih hmuh chhuah niin, hri a kàina hriat a ni lo. 

Pathianni khan ZMC laboratory-ah swab sample endik a ni lo a, TrueNAT-PCR hmangin Siaha leh Saitualah sample 19 endik ni mah se, Covid-19 positive an awm lo. RAT hmangin Aizawlah sample 98 leh Kolasib-ah sample 152 endik a ni bawk.

Mizorama Covid-19 vei hmuh chhuah tawh chu mi 4,323 an ni a, mipa 3,168 leh hmeichhia 1,155 an ni. Nimin tlai dar 5 thleng khan damin mi 4,240 (98.08%) chhuahtir an ni tawh a, mi pakua (0.21%) thi tawhin, enkawl mek mi 74 (1.71%) an awm.

January 16, Inrinni thleng khan Mizoramah swab sample 1,93,035 endik a ni tawh a, chu'ng aṭang chuan Covid-19 positive mi 4,323 chu endik zat aṭangin 2.23% a ni. Hripui vei hmuh tawh zinga mi 2,045 chu Mizoram chhunga kái an ni a, mi 2,278 chu Mizoram páwn aṭanga an rawn luh hnua hmuh chhuah an ni thung.