Kawng sira lirthei zan riah phalna pek ṭhin tihtawp CESJ-in an phût

Centre for Environment leh Social Justice (CESJ) chuan thuchhuah siamin, (night parking permit) pek chu sorkarin local council-te hnena lirthei lei turte'n garage an nei ngei tih hriatpuina pe tura thuneihna a pek nen a inkalh niin an tarlang a; zana kawng dunga LC-te'n night parking permit an pek ṭhin tihtawp an phût.

CESJ chuan, night parking chungchang chu November 18, Nilaini khan Aizawl Municipal Corporation (AMC)-ah an thehluh thu an tarlang a, "Aizawlah LC-te remtihnain AMC ward hrang hrangah night parking siam a ni a, LC lam hian parking fee an la ṭhin. Hei hi thil fel lo satliah ni loin, chhun zan zawma lirthei dahna garage ang maia hmang an awm ta zel hi Conflict of Interest a ni," an ti.

Transport department-in lirthei lei thar turte’n garage neih ngei tur a tihah LC-te chu an huam chhunga lirthei lei turte’n garage an nei ngei tih hriatpuina petu an nih thu sawiin CESJ chuan, "LC-te’n zana kawngpui dunga motor dah phalna pea parking fee an la hi thil dik lo leh dan an kenkawh tur nena inkalh a ni," an ti a; LC-te chu garage nei loa lirthei leite leh vantlang kawngpuia lirthei riah ṭhinte chunga action latu tur ni zawka an ngaih thu an tarlang.

Lirthei leitute'n garage an nei ngei tih hriatpuitu LC-te'n garage nei lote kawng kama lirthei dah phalna an pe leh si chu thil zahthlak nia an ngaih thu CESJ chuan an tarlang bawk.


CESJ THU LEH HLA

* Mizoram Legislative Assembly-in Mizoram Motor Vehicle (Amendment) Rules, 2010 pass-in, lirthei nei turte chu garage nei ngei tura phût an ni.

* 2010 khan Aizawl Traffic SP-in Mizoram MV (Amendment) Rules, 2010 angin Aizawl district-a lirthei ziah luh tawh MZ-01 F-7188 hnu lam tan garage an nei ngei tur a ni tih notification a chhuah.

* 2017-a Traffic Management Committee thutlukna angin Aizawl bikah November 1, 2017 aṭangin 'No Garage, No Car' khauh zawka lekkawh ṭan a ni.

* 2023-24 khan sorkarin Mizoram MV (Amendment) Rules, 2023 chu Gazette-ah December 8, 2023 khan a chhuah a, lirthei registration tih hmain garage certificate neih ngei tur a ti.

* February 12, 2024 khan Transport department-in Mizoram pum huapin LC leh VC te hnenah garage certificate pe chhuak thei turin thuneihna a pe.

* Kawngpui sira lirthei dah phal lohna dan kan nei chunga LC-te'n kawng kama lirthei dah phalna an pe te, number ziaka parking an hauhte hi a dik lo a, dan palzutna a ni.