
Children's Science Congress zawh a ni
Science Teachers Association Mizoram (STAM) leh School Education department buatsaih Children's Science Congress vawi 32-na, Berawtlanga Mizoram Science Centre-a buatsaih chu nimin khan zawh a ni a, India ram pum huap intihsiaknaa tel turin sikul pariat thlan a ni.
32nd Children's Science Congress-ah hian district 11 aṭangin project 44 entir a ni a; ram pum intihsiaknaa tel turin - junior category-ah Kids Care School leh Ar Ells School thlan niin, senior category-ah Mizo High School, Mizo Higher Secondary School, Saitual High School, St. Pauls Higher Secondary School, Modern English Higher Secondary school leh CLS Academy te a ni.
Children's Science Congress khârna inkhawma khuallian adviser to chief minister Dr KC Lalmalsawmzauva chuan, science leh technology lama hmasawnna chu mihringte harsatna sutkianna atan hman tur a nih thu a sawi a, "Mizoram hmasawnna tak tak thlen theitu pawimawh ber pakhat chu science & technology a ni a, Mizo zirlai tam zawkte'n basic science hriatthiamna tak tak an neih theih nan zirna kalphungah ngaihtuahna thar neih a ngai," a ti.