
Dan hnuaia naupang venhimna zirho
Mizoram State Commission for Protection of Child Rights (MSCPCR) chuan nimin khan Administrative Training Institute (ATI) Auditorium-ah 'Workshop on Strengthening Inter-Agency Coordination for Effective Child Protection and Juvenile Justice in Mizoram' an buatsaih a, Gauhati High Court judge Justice Helen Dawngliani'n a hmanpui.
Zirhonaah hian sorkar department hotu te, kohhran hrang hranga naupang lam buaipuitu te, tlawmngai pawl aiawh te, judicial magistrate te, Child Welfare Committee leh Juvenile Justice Board hotu te, Special Juvenile Police Unit hotute leh special public prosecutor-te an tel a; mithiamte'n thupui hrang hrang an sawi a ni.
Justice Helen Dawng-liani chuan, khawtlanga harsatna thleng hre hmasate chu kohhran leh pawlte an nih thu sawiin, "Pawl hrang hrangte hian danin a phal chin leh huam chin kan hriat reng a pawimawh. Mahni tih tur hre chiang a, dan kuta hlan tur chi chu dan kuta hlan thiam a ṭul a, dan kalha chêt a nih hian danin a tum ber ṭhelh phah theih a ni," a ti a; mahni mawhphurhna ṭheuh ṭha taka hlen a nihin inpuih tawn theih zawk a nih thu a sawi.
Protection of Children from Sexual Offences (POCSO) hnuaiah thubuai a tam thu sawiin Helen Dawngliani chuan, "Naupang chunga hleilenna te, kumtlinglo hna thawhtir te, naupang têa nupui pasal inneihna te a hluar. Hei hi do lêt tur chuan chhungkua aṭanga bul kan ṭan a ngai a, sikulte pawhin mawhphurhna sang tak an nei. Naupang leh naupang inkarah intihduhdahna a thlen loh nan sikul tinin policy mumal tak an neih a ṭul," a ti.