YMA-in ATL kawng siam mek an endik

YMA Sub-Headquarters, Lunglei hnuaia Road Monitoring Committee chuan November 18, Nilaini khan Aizawl - Thenzawl - Lunglei kawng (ATL Road) siam mek an endik a; Sekhum leh Kanghmun South inkar (km 15) kawng siamna tur tender chhuah a nih theih nan hma la thuai turin sorkar an ngen.

Kawng enfiah tur hian Road Monitoring Committee chairman K Lalfakzuala leh member dangte an thawk chhuak a; PWD (Road) hotute leh kawng siamtu SLT Infra Pvt hotu Brajesh Tunsial leh engineer-te'n an lo dawngsawng a ni.

Road Monitoring Committee chuan, Sekhum-Kanghmun South (km 15) kawng, PWD Lunglei aṭanga estimate thehluh vek tawh, tun thlenga tender loha la awm chu rang taka tender chhuah a nih theih nan hma la thuai turin sorkar an ngen a; hemi chungchangah hian Chief Minister hnenah lehkha an thehlut tawh tih an sawi.

Committee Chairman chuan, kawng siamtute'n hna an thawk muang lutuk chu an ngaimawh thu leh kawng chhia vanga chhim lam mipuite'n an tawrh nasat thu te, contractor-te hnathawh dan chu beitham nia an hriat thu leh an lungawi loh thu a sawi. A rang thei ang bera hna zawh a nih theih nan theihtawp chhuah turin contractor a ngen a, hmanhmawh vanga kawng siam quality ṭha lo an duh loh thu a hrilh bawk.