
PM-SVANidhi-ah Mizoramin Award a dawng

Mizoram Urban Development & Poverty Alleviation (UDPA) department chuan PM-SVANidhi-a hma la ber chawimawina, 'Best Performance - Digital Adoption Award' a dawng. Mizoramah PM-SVANidhi hnuaia hamṭhatna dawng mi 4,906 an awm mek.

Khawlaia thil zuarte'n eizawnnaa harsatna an tawhte loan hmanga phuhrûksakna tura Ministry of Housing & Urban Affairs-in a duan Pradhan Mantri - Street Vendor Atmanirbhar Nidhi (PM-SVANidhi)-a hma la ṭhate tan nimin khan Ambedkar International Centre, New Delhi-ah PM-SVANidhi Samman Awards Ceremony buatsaih a ni a; Mizoram chuan hmarchhak state-te leh tlang ram state-te zingah 'Best Performance - Digital Adoption Award' a dawng a ni.
PM-SVANidhi Samman Awards semna inkhawm hi Union Housing and Urban Affairs minister Manohar Lal Khatri leh minister of state Tokan Sahu ten an hmanpui a; Mizoram aṭangin award dawng turin UDPA director Jacob Lalawmpuia, joint secretary Margareth Larinawmi Fanai leh hotu dangte an tel.
June 2020 aṭang khan PM-SVANidhi kalpui a ni a, bank-te thawhpuiin, kawtthlera thil zuar (street vendor)-te hnenah loan Rs 90,000 thleng pek theih a ni. Loan rûl ṭhate tan sorkar laipuiin an loan pung 7% a rulhsak ṭhin.
PM-SVANidhi hi Mizoramah chuan UDPA department-in an kalpui a, mi 4,906 hnenah loan cheng vbc 8.48 pek a ni tawh a, loan pek tawhte zinga mi 2,780 chu digital transaction hmantir tawh an ni.