Aizawl Lal In centenary lawm a ni

Aizawl lal Makthanga Khiangte leh Hrawva Khiangte te lo chenna Aizawl Lal In chuan kum 100 a tling a, nimin khan Venghluia Aizawl Lal In tualah lawm a ni.

Aizawl Lal In centenary lawmnaah hian Makthanga Khiangte, Hrawva Khiangte leh an tu leh fate thlân lungdawh 33 chei ṭhat pho chhuah a ni a, ‘Hrawva: Father of Mizo Poetry Enlarged Edition’ lehkhabu bihchianna hun hman a ni. Mizoram State Museum-a dah turin Makthanga Khiangte leh Hrawva Khiangte tu leh fate'n Art & Culture secretary Zodingpuii hnenah Aizawl lal bungraw ṭhenkhat an hlan bawk.

Inkhawm hi VL Hruaizela Khiangte-in a kaihruai a, Hrawva Khiangte fapa K Liantlinga'n Aizawl lal leh chhungkaw chanchin a sawi. Lal Makthanga Khiangte leh Lal Hrawva Khiangte tu leh fate, kal khàwnbáwl 10-te bakah mi pawimawh dangte an tel a ni.