KHAWTHLIR

ABC inkhawmpui

Baptist Church of Mizoram (BCM) inkhawmpui lian ber dawttu, Area Baptist Council (ABC) inkhawmpui chu nizan khan Mizorama ABC hrang hrangah ṭan a ni a, November 22, Pathianni zanah a ṭiak ang. ABC inkhawmpui hi BCM ABC 17-ah neih a ni a, vawiin hian nilengin rorel inkhawm neih a ni dawn. Naktuk Pathianni chawhma inkhawmah kohhran upa thar 174 nemngheh an ni dawn a, chawhnuah Lalpa Zanriah Sakramen kilho a ni ang.

Mipui nen indawr

Aizawl North-III bialtu MLA K Sapdanga, minister chu nimin khan a bial chhunga Zarkawt Local Council House-ah veng mipuite dawr theih turin a ṭhu. Minister hi Zarkawta pawl leh mimal mi eng emaw zatin an dawr a, veng chhung hmasawnna atana pawimawhte leh mimal pawimawhte an thlen a ni.

MLA-in hlan

Aizawl South-II bialtu MLA Lalchhuanthanga chuan nimin khan a bial chhunga Model Veng Branch YMA hnenah Bolero pick-up thar a hlan. Lalchhuanthanga chuan, khawtlang tana YMA hmalakna leh inpekna ropui a tih thu sawiin, lirthei a pek chuan khawtlang rawngbawlnaah ṭangkaina tam tak a neih ngei a beisei thu a sawi.

Alu chi sem

Krishi Vigyan Kendra (KVK), Kolasib chuan November 19, Ningani khan kut hnathawktute hnenah alu chi an sem. Alu semna hun hi Kolasib KVK head Dr Michelle C Lallawmkimi'n a kaihruai a, alu chi semte chu mithiamte ráwn chunga uluk leh fimkhur taka enkawl a nih chuan kum tharah chuan Kolasib district chu alu-ah an intodelh theih a beisei thu a sawi. Khaw 14-a kut hnathawktute hnenah alu chi nga, quintal 160 sem tura ruahman a ni.

Tuidam centenary

Tuidam khua chuan nimin khan an khaw kum 100 tlin an lawm a, minister PC Vanlalruata'n a hmanpui. Minister chuan, Mamit district-ah kawng ṭha zawk a awm theih nan sorkarin ṭan a lak thu sawiin, "Kum tharah chuan Tuidam kawng hi a ṭha hle tawh dawn a ni," a ti.