SCERT-in Poetry Festival an buatsaih

Mizoram State Council of Educational Research and Training (SCERT) chuan nimin khan Aizawlah Poetry Festival 2026 an hmang a, School Education secretary K Lalthawmmawia'n a hmanpui a, higher secondary school zirlaite tana Poetry Writing Competition lawmman sem a ni.

On the spot Poetry Writing Competition-ah hian thupui chu 'My Culture, My Heritage' tih a ni a, sikul pakua aṭangin zirlai 42 an tel. Intihsiak hi November 17, 2026 khan buatsaih a lo ni tawh a, SCERT deputy director Lalnunsiami, Mizoram Christian College assistant professor Dr Lalbiakdiki Chawngthu leh Aizawl North College-a assistant professor Dr Ramdinthari ten an endik.

Poetry inziahsiaka pakhatna chu St. Joseph HSS-a pawl 12 zirlai Joyce Lalngaihzuali Fanai a ni a, Mount Carmel School-a pawl 11 zirlai Samuel Liansangpuia pahnihna niin, St Joseph HSS-a pawh 12 zirlai Rohlupuii pathumna a ni. Intihsiaka ti ṭhate hnenah lawmman hlan a ni a, kumin HSLC leh HSSLC-a English-a ti ṭhate hnenah lawmman hlan a ni bawk.

Nimina Poetry Festival khârna inkhawm chu SCERT director Caroline Zoramthangi'in a kaihruai a; khuallian K Lalthawmmawia chuan sap ṭawng thiam a pawimawh thu a sawi rualin, "Mahni ṭawng hnualsuata hmuhsit hi thil pawi tak a ni a, kan identity, culture leh history chawi nungtu a ni a, humhalh a, kan thiam a ngai," a ti.