Capping & Lamp Lighting hmang

Apollo School of Nursing chuan nimin khan Vaivakawn Cultural Centre-ah Capping & Lamp Lighting Ceremony vawi 22-na an hmang a, adviser to CM TBC Lalvenchhunga, MLA-in a hmanpui.

Principal Lalhmingmawii tarlan danin, Apollo School of Nursing hi kum 2005 khan din a ni a, kum tin zirlai 30 lak ṭhin niin, batch 22-na thleng zirlai an awm tawh. Batch 19-in an zir chhuak tawh a, zir chhuak tawhte chu mi 520 an ni. Zirlaite chu Hindi class neihpui ṭhin an ni a, zir chhuak tawhte tan Germany-a hna an thawh theihna turin hmalak mek a ni.

TBC Lalvenchhunga chuan, nurse-te chu hriselna lam enkawltu an nih angin khawi hmunah pawh hna zahawm nei an nih thu a sawi a, "Uniform in hâk hi mipui pawhin an zah a, damlo enkawl kawnga beiseina petu in nih bakah, damlote leh an chhungte thlamuantu in ni," a ti a; chhungkua leh ram leh hnam tana malsawmna nih tum ṭheuh turin a fuih.