Health Minister-in MJA free health check-up a hawng

Aizawl Civil Hospital (ACH)-in Mizoram Journalists' Association (MJA) Gen.Hqrs. member-te tana free health check-up an buatsaih tur chu nimin khan ACH-ah Health & Family Welfare minister Dr R Lalthangliana'n a hawng.

Dr R Lalthangliana chuan, Mizote zingah natna a lan chhuahin inenkawl dam turin a tlai fo tih sawiin, "Hetianga hriselna dinhmun endik ṭhin hi a ṭha. Tun ṭuma MJA endik tur hi mipui pawhin an hriselna dinhmun ngaih pawimawh phahna atan hmang se a duhawm hle. Ram changkang leh fing apiangin hriselna dinhmun an ngai pawimawh ṭhin," a ti.

Aizawl Civil Hospital chu tihchangtlun a ngaih thu sawiin Health Minister chuan, "Trauma Centre kan din dawn a, casualty pan luih luih hi a dik chiah lo. District dangah chuan trauma centre hi kan peih thawkhat tawh a, ACH-ah hian chinfel ngai a awm avangin kan la ṭan thei lo," a ti a; ACH compound-a doctor leh nurse-te quarters sa turin ruahmanna siam a nih thu a sawi.

MJA president Zonunsanga Khiangte pawhin thu sawiin, "Journalist ṭha ni turin hrisel a ngai a, hrisel loh chuan journalist ṭha a nih theih loh. Chumi atana ACH-in duhsak taka health check-up min tihsak ṭhin hi a lawmawm hle. ACH hi journalist-te'n kan intitatu hle a, thawhhona ṭha tak neih zui zel kan duh a ni," a ti.

Inkhawm kaihruaitu ACH medical superintendent Dr Lalhmuchhuaka chuan, ACH-in hma a sawn zel thu sawiin, "Khum 100 dah belh a ni a, khum 300 awm turin hma kan la. Dental department lamah pawh hmasawnna kan nei zel a, ha ngêt hnawh, ha lem siam leh a dangte tih theih zel kan tum," a ti a; spinal surgery pawh ACH-ah tih theih tura ruahmanna an siam thu a sawi.

Dr Lalhmuchhuaka chuan, hun rei tak chhe tawh CT Scan khawl chu thuneitu sang zawkte ruahmannain siamṭhat a nih tawh thu a sawi a, "Dialysis khawlte pawh dah belha tihchangtlun zel kan tum. ACH hmasawnna atan hian kawng hrang hrangin theihtawp kan chhuah a ni," a ti.

MJA free health check up-ah hian ACH doctor-te'n MJA member-te hriselna dinhmun a thlawnin an endik dawn a ni.