NEDA-a kan awm zel dan tur Party-in a ngaihtuah ang - Zoramthanga
MNF president Zoramthanga, chief minister chuan, Bharatya Janata party (BJP) kaihhruai North East Democratic Alliance (NEDA)-a MNF an tel zui zel dawn leh dawn loh chungchang leh, National Democratic Alliance (NDA) an thlâwp zel dawn leh dawn loh chu an party-in an la ngaihtuah tur thu a sawi.
Parliament (Lok Sabha)-ah January 8, Thawhlehni khan The Citizenship (Amendment) Bill, 2016 pass a nih tâk avangin BJP din NEDA-ah MNF-te an tel zui zel dawn leh dawn loh chungchanga Vanglaini palai zawhna chhangin Zoramthanga chuan, "Kan party-in kan la ngaihtuah ang chu. Mahnia thutlukna siamna chi a ni lo," a ti.
MNF President hian The Citizenship (Amendment) Bill, 2016 chu a tâwp thlenga an do tur thu leh Bill duh loh lantirna atana NESO bultuma India hmarchhak state tina January 8-a total bandh huaihawt pawh 100%-a a thlàwp thu a lo sawi tawh a ni.
Hetih lai hian MNF chuan nimin khan thuchhuah siamin, dodalna nasa tak karah leh total bandh hial huaihawt a ni chunga The Citizenship (Amendment) Bill pass a ni chu pawi an tih thu an tarlang.
MNF chuan, Bill chu Rajya Sabha-a pass a nih lohna tur leh paihthlak a nih ngei theihna atan theihtawp chhuaha hma an lak chhunzawm dawn thu an tarlang a, "He bill hi ṭha kan ti lo a, kan duh lo hle tih kan puang nawn leh a ni," an ti.
Zoram peoples' Movement (ZPM) pawhin thuchhuah siamin, Parliament-a The Citizenship (Amendment) Bill, 2016 pass a nih tâk avangin, MNF chu NEDA aṭanga báng turin an phût tih an tarlang.
ZPM chuan, The Citizenship (Amendment) Bill chu Mizote, hnam tlem leh Kristian sakhaw zuitute tan chuan India ramin dan a siam tawh zinga hlauhawm ber a nih hial thu an tarlang a, "Mizo mipuite'n kan theihtawpa kan dodal chuan ngaih pawimawh a hlawh zo ta lo a ni," an ti.
ZPM tarlan danin, Mizo hnam leh Kristian sakhaw chîmralna dan siamtu BJP chu MLA inthlana sorkarna chang ta MNF party nena NEDA-a inthlungkhawm, inthuruala theihtawp chhuah an ni.
CM Zoramthanga'n Bill a tâwp thlenga dodal a tum thu a puang chunga Parliament-ah pass a nih thu tarlangin ZMP chuan, "Mizo hnam thlavâng hauh tur leh Kristian sakhua humhalh duh vang talin MNF hian NEDA hi a chhuahsan tur a ni a, NDA a thlawpna pawh a titawp ngei tur a ni," an ti.