RS-ah Ronald Sapa a ṭang

Lok Sabha-in January 8, Thawhlehnia a pawm tâk The Citizenship (Amendment) Bill, 2016 a pawm hnuah, nimin khan Rajya Sabha-ah sawiho ve leh a ni a; India hmarchhak biala MP zinga NDA thlawp lotute chu nasa takin an ṭang tih, Mizoram MP Ronald Sapa Tlau chuan a sawi.

Ronald Sapa Tlau chuan, nimina Rajya Sabha session-ah hmar­chhak state aṭanga MP zinga NDA thláwp lotute chu The Citizenship (Amendment) Bill pass a nih lohna turin an ṭang nasa tih a sawi a, "Bill pass a nih lohna turin thî leh thau pawlhin kan ṭang a, theihtawp tak meuh kan chhuah a ni," a ti.

Ronald Sapa Tlau chuan nimin khan Rajya Sabha session-a zero hour-ah thusawi dilna Rajya Sabha Secretary General hnenah a thehlut a; Ronald Sapa chuan, Mizoram border area-a buaina hrang hrang, Chakma chungchang, ramri hung chungchang leh a kaihnnawih dangte Parliament-a a sawi chhuah theih nan zero hour-ah hian thusawi a dil thu a sawi.

India hmarchhaka NDA thlâwp lo MP-te chuan nimin vêk khan prime minister Narendra Modi hnenah joint memorandum an thehlut a, The Citizenship (Amendment) Bill, 2016 chu India ram, a bikin hmarchhak bial a hlauhawm dante an tarlang. 

-    Assam state sorkara Asom Gona Parishad party mi pathum chu minister aṭangin an báng a, AGP chu NEDA aṭangin an inhnûkdâwk.

-    Meghalaya Chief Minister kaihhruai National Peoples Party (NPP)-in NEDA aṭanga inhnuhdawh an tum thu a puang. NPP, Mizoram pawhin thuchhuah siamin, NEDA-a an thawhpui BJP kaihhruai sorkar laipuiin The Citizenship (Amendment) Bill an pass tak avangin NPP chuan NEDA an chhuahsan dawn tih an tarlang.