Aizawlah 'School Connect' buatsaih a ni

Zalen chanchinbu leh Lynchpin chuan, nimin khan Vanapa Hall-ah 'School Connect' a buatsaih a, School Education minister Lalchhandama Ralte-in a hawng. School Connect hi vawiinah chhunzawm a ni ang.

School Connect programme hawnna inkhawm hi Zalen editor Vanlalrema Vantawl-in a kaihruai a; Lalchhandama Ralte chuan, Mizo zingah tun hma aṭangin tum mumal neia lehkha zir an tam thu leh, tunlaiah pawh high secondary school level-ah zirlai 30% vel chiahin an hmalam hun atan ruahmanna leh tum mumal an neia hriat a nih thu a sawi a, "An zir chhunzawm zel tur duang lâwk leh tum nei rên ràwna zir an tam lo hle niin an sawi. Heng kawngah hian zirlaite bakah, zirtirtute leh nu leh paten hmasawnna tur kan nei niin a lang," a ti.

Lalchhandama Ralte chuan, zirlai tam tak chuan an pass ṭhat deuh chuan science zir an tum ngawt ṭhin tih sawiin, "Eng hi nge ka tuipui tur, eng hi nge ka ram leh hnam tan te, kan chhungkaw tan te, eizawnna kawngahte ka hlawhtlinpui tur tih ngun taka ngaihtuah a ngai," a ti a; ṭhiante tuipui záwng tuipui ve ngawt te, ṭhiante zirna hmuna zir ve ngawtte chu tih loh tur a nih thu a sawi.

School Education Minister chuan, School Connect programme chuan Mizo zirlai, pawl 11-12 ni mekte tan kawng dik leh ṭha a kawhhmuh ngei a beisei thu a sawi a; zirlaite chu thu leh hla an dawnte hlâwkpui ngei tum turin a chah.

School Connect-ah hian India rama institution eng emaw zatin stall an hawng a, mithiamte'n zirna chungchangah seminar an buatsaih a; Aizawla pawl 11 leh 12 zirlai ṭhahnem takin an chhim a ni.