Sorkarin MLA-te motor a leisakna tur Morgue van lei nan hman tum

Tuirial bialtu MLA Andrew H Thangliana chuan nimin khan a bial chhunga Thingdawl khua a tlawh a, Thingdawl khaw chawmna tura Tuihnar­tam tui lakna tura PHE department hnathawh mek a hmunah a enfiah. Andrew H Thangliana chuan, sorkarin MLA-te tana motor leina tur a pek ṭhin chu a bial chhunga hman tur morgue van lei nan hman a nih tur thu a puang.

Andrew H Thangliana hi Thingdawl BDO, PHE executive engineer leh junior engineer-te bakah, Thingdawl NGO Coordination Committee hruaitute'bn an ṭawiawm a; PHE hotute chuan, Tuihnartam lui tui lak hna chu March 2019 velah zawh theih beisei a nih thu an sawi.

Thingdawla Zoram Peoples' Movement (ZPM) chuan nimin vek khan Thingdawl Chhimveng YMA Hall-ah bialtu MLA thar lawmna hun an buatsaih a; Andrew H Thangliana chuan, MLA-a thlantlin a nih avanga a lawm thu sawiin, Assembly budget session neih hma ngeiin bial chhung khaw hrang hrang tlawh chhuah a tum thu a sawi a ni. 

Andrew H Thangliana chuan, MLA-te hamṭhatna pek tur zingah sorkarin motor leisak tur tih a nih thu sawiin, "Hei hi keini chuan kan biala ruang phurna (morgue van) lei nan kan hmang dawn a ni," a ti a; "MLA fund hi a ṭha thei ang bera hman ka tum dawn a, mimala hausakpui tumte tan beisei chi a ni lo ang," tiin, MLA fund chu en chian tlak leh langtlang a ni dawn tih a sawi.

Sorkarah a fawng vuantu lamah ṭang rih lo mah se, a bial tan MLA awm mai mai leh MLA ngawi reng nih a tum loh thu sawiin Andrew Thangliana chuan, "Bial chhung mipui, sorkar hnathawk leh V/C tin te, party tin leh NGO, experience tam tak lo nei tawhte thawhpuiah ka sawm che u. In finchhuah ka ngai zel dawn a, kan bial hmasawn zel nan in lakah beiseina sang tak ka nghat a ni," a ti.