Mamit district-a hmalaknate thlirho

Sorkar laipuiin district hnufual, chawikan ngai bik, Aspirational District a puan zinga Mizoram aṭanga tel awmchhun Mamit district-a hmalakna hrang hrangte nimin khan district bawrhsap Vanlalngaihsaka hoin DC conference hall-ah a kaihhnawih department hotute'n an thlirho.

Meeting-a tarlan danin, Mamit district chhunga secondary school bika electric êng pek vek tura tih chu Power & Elec­tricity department hma­laknaa thawh zawh a ni tawh. PHE department hmalaknain inthiarna nei lo tan individual household latrine (IHHL) sak nan unit khat zelah Rs. 7,000 hman a ni tawh dawn a, chutih laiin, Rs. 7,000 baka sên belh ngai a awmin a dawngtute'n an tum ve tur chu mi tam takin an tum theih ṭhin loh avangin harsatna a awm ṭhin.

Horticulture depart­ment hmalaknain khaw ṭhenkhatah chhungkaw tin mamawh dan azirin an thlai chîn tur thlai chi leh a ṭiak sem a ni a; tun dinhmunah a rah seng tur a la awm loh avangin hmasawnna hmuh mai tur a awm rih lo. AH&Vety department hmalaknain ran vulhte hriléng laka an him theih nan hri danna pek ṭhin a ni.

Zirna-in zawng zawng­ah hmeichhiate tana inthiarna bik siam a ni a, naupang sikul chawlhsan (drop out), zirlaite quality leh teacher pupil ratio dinhmun ṭha lo lutuk chu district dinhmun tichhetu a la nih thu tarlan a ni bawk.