Dr. Beichhua'n ṭan la lehzual turin fuih

Animal Husbandry & veterinary (AH&Vety) department-a thawktute chuan, nimin khan Vete­rinary Polyclinic confe­rence hall-ah kum thar atana inhlan tharna hun an hmang. An hun hmanpuitu AH&Vety minister Dr K Beichhua chuan ṭan la thar lehzual turin a fuih.

Inkhawm hi AH&Vety director Hmarkunga'n a kaihruai a; Dr K Beichhua chuan, "Hna thiam chuan hna an tui lo thei lo, hna thawk ṭha peih lote chu a thiam lo an ni zel. Kan zir chhuah mai bakah, kan experience a pawimawh. Tih tak takna nena kan thawh chuan hmanraw hman tur a awm zel ṭhin," a ti.

AH&Vety Minister chuan, PRRS a lên lohna tura theihtawp chhuah te, sa hrisela intodelhte leh artuia intodelhte chu kumina department thil tum langsar tur a nih thu a sawi a, an tihhlawhtlin theihna atan ngaihtuahna sêng ṭheuh turin thawktute a sáwm.

Mihring leh sum leh pai lama department indaih lohnate a hriat thu sawiin Dr. K Beichhua chuan, "Chumi chingfel tur chu keimahni kan ni. Department pawimawh ber sawi thiam a har viau. Ṭan tlan loh chuan department pawimawh a ni thei lo. Department hmasawnna atan kan pawimawh ber tih i hre reng ang u," a ti.

AH&Vety deptt-ah hian sanction post 1,119 a awm a, thawktu 902 awm mekin, post hnawhkhah loh 217 a awm a ni.