Supply Minister-in Gas buaipuitute a kâwm

Food, Civil Supplies & Consumer Affairs (FCSCA) minister K Lalrinliana chuan, nimin khan a pisaah Indian Oil Corporation Ltd. hotu te, Mizoram chhunga gas (LPG) distributor hruaitute leh bank hrang hranga hotute a pisaah a kâwm. 

K Lalrinliana chuan, sorkarin mipui tana ṭang­kai tur thil tam tak a duan thu sawiin, "Mipui chhâwk zângkhai thei tura sorkar hnuaia subsidy hrang hrang awmte hi chak leh zau zawka inzirtir a pawimawh tak zet. LPG subsidy chungchanga harsatna kan tawh tam tak pawh hi inzirtirna kan kalpui chak tâwk loh vang a ni," a ti.

FCSCA Minister chuan, gas semna hmun (distribution point) siam belh leh distribution point-a gas cylinder sem chhuah zat tihpun a ṭul thu a sawi a; gas cylinder, gas pipe leh stove-te chu hunbi dik taka endik a nih theih nan hma la turin IOC leh gas distributor-te a hrilh.

Meeting-a tarlan danin, Pradan Mantri Ujjwala Yojana (PMUY) hnuaiah Mizoramah January 1, 2019 thleng khan mi 25,080 hnenah gas connection pek tawh a ni a; Aizawlah connection 5,432, Champhaiah 3,270, Kolasib-ah 2,910, Lawng­tlai-ah 2,995, Lungleiah 4,893, Mamitah 3,853, Siahaah 551 leh Serchhipah 1,176 pek chhuah a ni tawh.

PMUY scheme hi hmei­chhe tan bika duan niin, September 15, 2017-ah Mizoramah hman ṭan a ni a, LPG distributor-te hnenah ration card leh Aadhaar card-te hmanga dil theih a ni.