KHAWTHLIR

Member of Legislative Assembly (MLA)-te hamṭhatna hrang hrang ngaihtuahtu, Assembly General Purpose Committee (GPC) chu nimin khan an chairman Lalrinliana Sailo, Assembly speaker hoin speaker conference hall-ah an 

ṭhukhawm a, he thu ziah lai hian an thurel kan hre hman lo. General Purpose Committee-ah hian member-te chu - Chief Minister, Finance Minister, Parliamentary Affairs Minister, Opposition Group leader pahnih leh Assembly Committee hrang hranga chairman-te an ni.

Mizoram sorkara deputy chief whip Lalrintluanga, MLA chuan nimin khan Assembly Secretariat-ah a pisa a luah ṭan. Lalrin­tluanga Sailo chuan, ram tana kan thawh tawhna leh kan thawh zelna turah mi dang ni loin, mahni chan en a ṭul thu sawiin, "Chutiang chuan rilru kan buatsaih a ṭul a ni," a ti.

Sairang Village Council hmalaknaa Tlawng kawng chei ṭhat chu, nimin zing khan Rural Development minister Lalruatkima'n a hawng. Kawng hawn tâk hi Tlawng panna a ni a, MGNREGA aṭang leh mi ṭhahnemngaite sum thawhkhawm hmanga siam a ni.

Nimin khan Aizawl addl. DC VL Hruaizela hoin DC conference hall-ah kumina Aizawla Republic Day hman dan tur sawiho a ni. Rua­hman lawk dan chuan Republic Day hi zing dar 8 ah Lammualah lawm ṭan tur a ni a, parade contingent - school contingent 14, armed contingent 11, NCC contingent pathum, Scouts & Guides contingent pahnih; ex-servicemen contingent leh band party pathum an tel ang.

Thawhlehni zan zanlai pelh hnu, January 9 zing khawvar hma khan Suarhliap khua Lalbiakkima in a kang a, bungrua chuh hman lohin a kâng ral. Thu dawn danin, inah hian Lalbiakkima leh a fate pahnih an riak a, in a kâng tih an hriat chuan a zatve vel a kâng tawh a, bungrua chuh hman loin an tlan chhuak nghal a ni. Suarhliap Branch YMA chuan nimin khan in kâng sak ṭhat hna an thawk nghal a, mi 100 vel an thawk chhuak a ni. Bialtu MLA H Lalzirliana leh Mamit DC-in ṭanpuina an pe.