Zu khapna dan - MLP Act Rules tel loin kalpui rih dawn
Mizoram Liquor (Prohibition) Act (MLP Act) chu Council of Ministers meeting thutlukna angin rules tel loin kalpui rih a ni dawn. MLP Rules chungchang hi January 27, Thawhṭanni khan Council of Ministers chuan an ngaihtuah a ni.
Excise & Narcotics department (END) hotute hnen aṭanga thu dawn danin, Council of Ministers chuan 'The Mizoram Liquor (Prohibition) Rules, 2020 chungchang an ngaihtuah a, hun danga ngaihtuah leh turin an dah a; MLP Act chu rules tel loa hman rih turin thutlukna an siam.
Vanglaini palai zawhna chhangin END hotute chuan, MLP Act chu rules awm rih lo mah se kalpui theih tho a nih thu an sawi a, "Act chauh hian Council of Ministers chuan kalpui rih ṭha an ti a nih a rinawm," an ti.
Hetih lai hian, MLP Act-ah hian zu leh a kaihhnawiha thil mante tihral dan tur tarlan a ni lo. Hemi chungchangah hian END hotute chuan sorkarah tihral an dil ang a, sorkarin ruahmanna a siam angin an tihral mai tur thu an sawi a,
"Act-ah khan total prohibition tih a nih avangin tourist leh doctor-in an chawhte tan pawh lei tur siam a ni dawn lo," an ti. December, 19, 2019-a notification hmanga tihchhuah The Mizoram Liquor (Prohibition) Rules, 2019 chungchanga zawhna chhangin END hotute chuan, "Kha kha chu cancel a ni mai turah kan ngai," an ti a; chutih rualin, cancel order chhuah a nih hun tur an hriat loh thu an sawi.
Tarlan tawh angin, December 19, 2019-a MLP Rules tihchhuah ang chuan, phalna neite'n beer leh wine siamin an zuar thei dawn a, hun bikah phalna nei tan tualchhung zu (country made liquor) siam theih a ni ang a, tourist leh doctor lehkha neite tan sorkarin zu dahkhawmna a siam kudam aṭangin zu lei theih a ni dawn a ni.
Chief minister Zoramthanga chuan January 13, 2019 khan zu khapna dan duan mekah rawtna hrang hrang a awm tih a sawi a, "Dan hmasa lama lo awm tawh, zupui leh zufáng ang chite kût nía entira pholante a ṭha em tihte rawtna a awm. Inrâwn tawnna kalpui mek a nih laiin zu zuar leh tur ang lek leka sawina a awm," tiin, MLP Rules tur chu Cabinet-in a ngaihtuah tur thu a lo sawi tawh a ni.