RD dept.-in inhlan tharna hun hmang

Rural Development Directorate-a thawkte chuan nimin khan an conference hall-ah kum 2019 atana inhlan tharna hun an buatsaih a, RD minister Lalruatkima'n a hmanpui.

Lalruatkima chuan, mihringte chu inzir reng tur an nih thu sawiin, "Khawvelah hian kan hriat aiin kan hriat loh a tam zawk a ni tih hria a, thlen chin aṭanga hmasawn zel tumna rilru pua ṭan lak a ngai. Information technology lamah nasa lehzuala hmasawn a ngai, IT kan thiam tlan chuan mi pakhatin hna tam tak awlsam takin a thawk thei dawn a, paperless office kalpui hi thil theih a nih avangin he lam hawi zawnga rilru peka ṭan lak a pawimawh hle," a ti.

Department-a thawktute chu thla tin hlawh lak ringawt chu an tum ber ni lo se a duh thu sawiin RD Minister chuan, "Hmasawnna ngêlnghet thingtlanga thlentir tura theihtawp chhuah hi kan tum ber tur a ni. Inléng dawnsawn kawngah te, hun vawn dik leh hriselna chungchangahte pawh mahni invawn uluk a pawimawh hle," a ti a; minister viak ṭha leh taima, a ngaihna hre tak takte'n RD dept. an lo kaihhruai tawh avangin, insit hle mah se, thawktu fel tak takte nena ṭan-rualna ṭha leh thawhhona ṭha hmachhuanin engmah a huphurh bik loh thu a sawi.

RD director Rita Lalnunmawii Pachuau chuan, inthununna, tih tak takna leh hun vawn dikte chu kum 2019 chhunga an department innghahna thupuiah hman a ṭul thu a sawi bawk.