ZORO ṭhalaiin an hmalakna tur an puang

Zo Reunification Or­ganisation (ZORO) ṭha­­laite chuan, ZORO thil tum chu Zo fate in­pumkhatna tur leh insuihkhawm theihna tur kawng awm thei apianga hmalak leh rilru zau tak púa Zo fa chi péng hrang hrangte ziaráng a theih ang anga humhalh leh chawisan a nih thu leh, chu'ngte chu a hlawhtlin theih nan ZORO ṭhalaite'n hma an lak zel dawn thu an sawi.

ZORO ṭhalai hruaitute hian nimin khan Aizawl Press Club-ah thuthar thehdarhtute an kâwm a; ZORO ṭhalai president L Ramdinliana Renthlei chuan, Zo fate rorelna pakhat hnuaia awm chu an thil tum a nih thu sawiin, "Independent hi a tum tihna a ni em, tih zawhna a awm thei. Zêp tur a awm lo a, nationalist reng reng chuan sovereignty hi an duhthusam vek a ni a, hma kan sawnin kan ṭhatpui ber ang tih pawh a rin theih," a ti.

L Ramdinliana Ren­thlei chuan, khawvel hriat­puiin United Na­tions (UNO)-ah Zo fate chanvo dik tak chang tura beihna tur kawng a awm thu sawiin, chumi chungchangah chuan ZORO-in nasa takin hma an la tawh ṭhin a, ZORO ṭhalai pawhin hmalak chhunzawm zel an tum thu a sawi a ni. Zo fate chu rorelna pakhat hnuaiah awm vek lo mah se, rilru leh thinlung lamah inpum­khat taka an awm theih nan ZORO-in hma an la ṭhin tih sawiin L Ram­dinliana chuan, "Ramri leh khawsak phung lo dang ta vanga mahni unau, mahni chipui ngei pawh inhre tawn tawh lo te, unau hmélhaia lo awm tawhte hûi khawm a, thlah khat unau kan nihzia leh thisen inzawm kan nihzia hriattir hi kan thil tum pakhat a ni," a ti.

ZORO ṭhalai Presi­dent chuan, ṭawng a inan loh vanga unau hmelhai a awm ṭhin chu pawi an tih thu a sawi a; ZORO ṭhalaite chu a ṭul ang zelin hmun hrang hranga Zo fate'n an mamawhna hmunah leh an thlavâng hauh turin an che chhuak zel dawn tih a sawi bawk.