KHAWTHLIR

Kulikawn Bial KṬP chuan nimin khan blood donation camp an huaihawt a, Aizawl Civil Hospital tan thisen unit 41 an pe. UPC(NEI) Serchhipa ṭhalai pawl, PYD-te pawhin Serchhip District Hospital tan thisen unit 20 an pe a, a petute hmeichhia 11 leh mipa pakua an ni.

Synod Mission Board (SMB) chuan missionary (contract)-a thawk tur an lak tharte chu January 9, 2019 aṭang khan Mission Veng Kohhran Hall-ah Orientation Training an neihpui ṭan. Training hi January 30, 2019-ah an zo ang a, chumi hnuah an thawhna tur hmun an pan ang. Mizoram Synod chuan tun ṭumah hian SMB hnuaia thawk turin missionary 86 a la thar a, mipa 32 leh hmeichhia 54 an ni.

Central YMA hnuaia SRS duty-te chuan nimin khan Hmingthanliani w/o Lalramliana, Ṭhuampui nia inchhál hnen aṭangin heroin no. 4 hawng khat leh can 6 an man a, Excise & Narcotics hnenah an hlan. Ruihhlo an man hi Aizawla an hralhna ang chuan Rs. 50,000 hû a ni. 

Power & Electriciy department chuan hriattirna tichhuakin, naktuk Inrinni hian Luangmual Sub-Station-ah hna thawh a ngaih avangin kawlphetha tihtawp a ngaih dawn thu an tarlang a, "Hei vang hian zing dar 10 aṭanga chawhnu dar 3 chhung Sairang, Lengpui, Dinthar, Tuikual, Khatla, New Capital Complex leh Dawrpui Vengthar-te'n êng an nei dawn lo a; chawhnu dar 1 aṭanga chawhnu dar 3 thleng Vaivakawn, Chanmari West, Chawnpui, Kanan, Seventh Day Tlang, Tuikhuahtlang leh Upper Khatla-in êng an nei dawn lo," an ti.

Serchhip district electoral roll observer H Lalengmawia hoin nimin khan DC conference hall-ah Electoral Roll Revision, 2019 kalpui mek chungchang sawiho a ni. H Lalengmawia chuan, electoral roll dik leh felfai tak neih a ṭul thu a sawi a, "Chu chu ram leh hnam humhimna hna pawimawh tak a ni," a ti. 

Serchhip district electoral roll observer H Lalengmawia hoin nimin khan DC conference hall-ah Electoral Roll Revision, 2019 kalpui mek chungchang sawiho a ni. H Lalengmawia chuan, electoral roll dik leh felfai tak neih a ṭul thu a sawi a, "Chu chu ram leh hnam humhimna hna pawimawh tak a ni," a ti.