MPCC-in mipui chibai an bûk

Mizoram Pradesh Congress Committee (MPCC) chuan nimin khan thuchhuah siam­in, Mizoram mipui leh Mizoram páwna Zo hnahthlak awm zawng zawngte kumthar chibai an bûk a; chhiatna lian tham awm loa Krismas leh kumthar lawm a ni chu lawm­awm an tih thu an tarlang.

Congress party chuan, "Kumthar 2020 hi Mizoram mipui zawng zawng tan, chhung­kaw tin tan malsawmna dawn kum ni se kan duh. MNF kaihhruai Mizoram sorkar pawhin mipui tan hmasawnna hna tluang taka a thawh theih kan beisei tak zet a ni," an ti.

MPCC chuan, sorkar laipuia thuneihna changtu BJP-in Hindu lal ram siam a tumna kal zelah kum 2020 chu Uniform Civil Code (UCC) an tih mai, India rama sakhua leh hnam tihdan hrang hrangte Hindu kalphung anga her rem tuma hma an lak ṭan hun tura an lo puan lâwk tawh a nih thu an tarlang a, "Mizo Kristian-te leh Mizo hnam tan he kum 2020 hi kum pawimawh tak a ni dawn a ni," an ti. Chuvang chuan, kum 2020 chu Mizoram mipui zawng zawng ṭan rual kum, Mizo hnam leh sakhua humhim tura nasa lehzuala ṭan ruala lungrual kum ni thei se an duh thu an sawi a ni.