Mizo hming hawha sumdawngte February thlaa titàwp turin hriattir
Mizo Zirlai Pawl (MZP) Sub-Headquarters, Thenzawl leh Thenzawl Venghlun Branch YMA-te chuan, Thenzawl Venghlun huam chhunga hnam dangte'n Mizo hming hawha hotel/restaurant an siam pathum chu February 2020 chhunga titàwp turin nimin zing khan an hriattir.
Thenzawl MZP leh Venghlun Branch YMA-te hian Thenzawl Venghlun huam chhunga hnam dang (vai) awmte chu dan ang taka Mizorama awm an nih leh nih loh nimin zing khan an enfiah. Thenzawl Tourist Lodge bula hotel leh restaurant siam a, dawr tê siam nghal bawk mi pathumte chu Mizo hming hawha siam a ni tih an hmu chhuak a ni.
Dawr nghaktu, a neitu anga awmte chu ILP nei mumal lo leh an ILP-a Mizorama an awm chhan (purpose of stay) ang hna thawk lo an nih avangin MZP leh YMA-te chuan February 2020 ral hma ngeia hotel/dawr titawp a, inthiarfihlim turin an hriattir a ni. Hotel/dawr neitu (hming putu) Mizote chu dawr an siam chhunzawm duh a nih chuan, hnam dang chhawr lo a, Mizo ngei chhawr turin an ngen bawk.
Thenzawl MZP leh YMA chuan an khuaa hna thawka awm hnam dang, ILP neih ngai an enfiah bawk a, ILP siam mek nia insawite chu a rang thei ang bera chinfelna hun an pe. Thenzawla sorkar in sakna hmun pakhatah hnam dang kumtlinglo chhawr an awm chu ṭha lo an tih thu leh thuneitu lamte pawhin kumtlinglote Mizorama hna thawk turin ILP pe lo se an duh thu an tarlang.
MZP Sub-Headquarters Thenzawl chuan, Thenzawl khua chu khaw ṭhang duang tak a nih avangin hnam dangte'n hotel/restaurant/dawrte an siam a, Thenzawlah bu khuar an tum meka an hriat an sawi a; Thenzawlah hnam dang dan loa dawrkai an awm loh nan YMA nen hmalak zel an tum thu an sawi a ni.