Health Minister-in Cancer Hospital a tlawh
Health & Family Welfare minister Dr R Lalthangliana chuan nimin zing khan Zemabawka Cancer Hospital a tlawh a, Tertiary Care Cancer Centre sak mek a enfiah.
Minister Dr R Lalthangliana hi Cancer Hospital hotute'n lo dawngsawngin, hmalakna kal lai mekte an sawiho a; Minister chuan, Cancer Speciality Hospital neihna tura Japan International Cooperation Agency (JICA) nen cheng vbc. 500 hmanga thawhhona an hmuh tur hmangin theihtawp chhuah a nih tur thu a sawi.
Health Minister chuan, Mizoramin Cancer Hospital changtlung leh ṭha zawk a neih theihna turin theihtawp chhuaha ṭan lak mek a nih thu te, sum leh pai lama harsatna awmte pawh sukiang turin sorkarin nasa taka ṭan a lâk thute a sawi bawk.Dr R Lalthangliana hian damdawi-in chhung a fang kual a; damdawi-ina a ṭul apianga hman atan Rs. 10,000 a hlan bakah, electric power supply khaihlak vanga cancer hemna kháwlin harsatna a tawh ṭhin sutkian nan an chhungkaw hmingin generator lian a pe a ni.
Minister hian Cancer Hospital ram chu Zemabawk Local Council leh khawtlang hruaitute hriatpuinain a en a, ramri a rang lama tihfel theihna tura hmalak dan tur an sawiho. Central Medical Store a tlawh bawk a, CMS chu a awmna hmunhma remchang zawka sawn chhuah emaw, a panna kawng ṭha zawka siam emaw dan tur an sawiho a ni.