IGNOU-in Convocation an hmang

Indira Gandhi National Open University (IGNOU) Regional Centre, Aizawl chuan nimin khan Aizawl West College auditorium-ah Convocation vawi 33-na an hmang a, Prof. Lianzela'n a hmanpui.

Prof. Lianzela chuan, IGNOU chu khawvela university lian ber a nih thu sawiin, "UGC pawmpui ngei a nih avangin a rintlak a, ṭhalaite hlawhtlinna kawng hrang hrangah IGNOU hian a thawh hlâwk hle," a ti. Zirlaite chu rinawm leh zahawm taka awm tura fuihin Lianzela chuan, "In degree leh certificate-in hlutna leh zahawmna a ken tel ang ngeiin awm ula, ram tana chhenfâkawm takin awm ang che u," a ti a; an thiamna leh finnate din chhuahpui nana hman tum turin a chah.

IGNOU regional director Dr SR Zonun­thara chuan, tun ṭum convocation-ah hian India ram puma IGNOU-ah zirlai hlawhtling degree/diploma dawng thei mi 2,31,573 an awm thu a sawi a; Unnat Bharat Abhiyan hnuaiah khaw thlan bik pathum an nei a, chu'ngahte chuan Swach Bharat Abhiyan hnuaiah zirna kalpui pahin faina leh hriselna chungchang inzirtirna an kalpui thu a sawi bawk.

IGNOU Regional Centre, Aizawlah hian kum 2019 khan zirlai 7,772 an awm a, chu'ng zinga zirlai 871 chuan nimin khan degree/diploma certificate an dawng. Tun dinhmunah zirlai 20,000 chuang an awm mek a ni.