NGO Coordination Committee-in E.Roll aṭangin Bru paih thuai duh

NGO Coordination Committee (Joint NGO) chuan thuchhuah siamin, kum 22 chuang Mizo mipuiin Bru chungchanga ṭha­hnemngai leh dawhthei taka hma an lâknain rah ṭha a chhuah ta chu lawmawm an tih thu an tarlang a; Tripura-a Bru awm hlen turte Mizoram Electoral Roll aṭangin a rang lama paih an nih theih nan hmalak zui an tum thu an puang.

YMA, MUP, MHIP, MZP leh MSU-te telna Joint NGO hruaitute chu nimin khan Central YMA pisaah an inhmukhawm a; thuchhuah siam nghalin, "Tripura Transit Camp-a Tuikuk awmte ṭum kua lai Ministry of Home Affairs leh Mizoram sorkarin hruai haw a tum pawha haw duh hauh lo te, lawm taka Mizo mipuite'n ṭum tam tak dawnsawn kan tum lai pawha lo kîr duh lo te, January 16, 2020-a Union Home Minister hoa inremna ziah anga Tripura-a awm hlen tura tih an lo ni ta hi lawmawm kan ti hle a ni," an ti.

Joint NGO chuan, "Tripura-a Tuikukte an awm ngheh dawn tak avang hian Mizoram Electoral Roll aṭanga a rang lama paih an nih theih nan hmalak zui zel ni se ṭha kan ti. He inremna siam hi bawhzui a nih danah NGO Coordination Committee chuan ngun takin a en zui zel dawn a ni," an ti a; ṭhahnemngai taka Mizoram sorkar, political party leh Mizo mipuite hmalaknaah lawmthu an sawi tih an tarlang a ni.