Missionary Day vawi 125-na lawm a ni
Nimin kha Mizorama missionary hmasa Sapupa (FW Savidge) leh Pu Buanga (JH Lorraine) ten January 11, 1894-a Mizoram leilung an rah champha, Missionary Day vawi 125-na a ni a, Baptist Church of Mizoram (BCM) kohhrante'n uar takin an lawm. Thupui chu 'Isua Krista, khawvel chhandamtu' tih a ni.
BCM hruaitute hnen aṭanga thu dawn danin, Missionary Day vawi 125-na, Mizoram Gospel Quasquicentennual lawm nan hian BCM tualchhung kohhran tinte chuan Ningani zan khan an kohhran ṭheuhah kum 125-na mei an dêt a, nimin zing dar 7 khan kohhran tinah jubilee dár vawi 125 vuak a ni.
Nimin zing vek khan district hrang hrangah Mizoram Gospel Quasquicentennial hriatrengna lungphun (monument) hawn a ni a, Aizawlah chuan AICS campus-ah hawn a ni.
Missionary Day-ah hian nimin zing khan Sapupa leh Pu Buanga te innghahna hmasa MacDonald Hill, Zarkawta Sapupa leh Pu Buanga te hriatrengna lungphunah BCM Chanmari Kohhran leh Presbyterian Kohhran Dawrpui Bialte'n hun an hmangho a ni. Chhun lamah tualchhung kohhran tinin a lawmna hun an hmang a, tlaiah ruai an ṭheh hlawm.
BCM kohhran ṭhenkhatah chuan missionary-te chah chhuah niin, missionary-te'n an rawngbawlna report an sawi. BCM hian kum 2018 chhung khan mission field hrang hrang ringtu baptisma chang thar 3,982 an nei a ni.
Missionary Day vawi 125-na pual hian Mizoram Ṭhalai Kristian Pawl chuan essay competition leh hla inphuahsiak an buatsaih bakah, Siaha leh Kolasib-ah Gospel Concert an buatsaih a; Aizawl Area ṬKP Coordination-in Fakzairi an buatsaih bawk.