Theihna sang ber nen hna kan thawk dawn - Minister Lalchhandama

Darlawn Joint V/C chuan nimin khan Dar­lawn Bazarah Tuivawl bialtu MLA thar, Lal­chhandama Ralte, School Education minister hmuahna leh lawmna an buatsaih. Minister chuan thu sawiin, MNF sorkar chuan a theihna sang bera hna a thawh tur thu a sawi.

Lalchhandama Ralte chuan, MLA atan Tui­vawl biala thlan tlin a ni leh minisrter chanvo ropui tak a chan chu Pathian vang a ni tih sawiin, Pathian leh bial mipui chungah lawmthu a sawi a; hna thawk tura siamtu chu bial mipuite an nih thu leh hnathawh kawr an hâktir avangin theihpatawpa a thawh dawn thu sawiin, "Sorkar thar lak luh veleh Chief Minister duh dan angin tih tur kan ti nghal a, kan thutiam kawngah theihna sang ber nen hna thawh kan tum a ni," a ti.

Minister Lalchhan­dama chuan, Tuivawl bial mipuite chu kawng hrang hrangah amah ṭawiawm tura sáwmin, Pathian zarah chapo thei loa thlan tlin a nih thu leh tlangdung mipui tute tan pawh hna thawh a tum thu a sawi a; zirna lamah chuan campaign laia an auhlate tihhlawhtlin a nih theih nan ṭawngṭaina nena ṭawiawm turin a sáwm bawk.

Lalchhandama Ralte lawmna hun hi East Phaileng khuaah pawh hman a ni a; MLA atana thlan tlin a nih angin, bial mipui zawng zawng tan a nih thu leh amah vote lotute tan pawh inthlahrunna tur a awm loh thu a sawi.

School Education Mi­nister hi MLA C Lalmuan­puia, School Educa­tion director K Laldingliana, LESDE director Lal­hmunsanga Hnamte, SSA-RMSA state project director Lalhmachhuana ten an ṭawiawm a ni.