Zofate Chawlhbûk tifaiin MZP an hnatlang

MZP chuan January 10, Ningani khan Chakma Autonomous District Council (CADC) chhung, Borapansury-a Zofate Chawlhbûk an sak tawh tihfai leh a chhehvel sâmfai hnatlang an nei. MZP president L Ramdin­liana Renthlei hoin Aizawl leh Lunglei aṭangin MZP hruaitu eng emaw zat an thawk chhuak.

Borapansury-a Zofate Chawlhbuk hi kum 2014-ah sak ṭan a ni a, kum 2015-ah sak zawh niin, September 10, 2015-ah hawn a ni. A chhehvel sâmfai hnatlang, Ningania neihah hian MZP Gen.Hqrs. hruaitu eng emaw zat bakah, Lunglei, Ṭhiak, Lungsen, Tlabung, Chawngte, Chawipui leh Chawilung aṭangin MZP hruaitute eng emaw zat an tel.

Zofate Chawlhbûk sâmfai hnatlang ṭan hmaa hunserh hmanah L Ramdinliana Renthlei chuan, CADC area chhungah Chakma tan lo chuan in leh lo, ram neih theih loh turin CADC sorkarin dan an siam tih sawiin, "Hei hi MZP chuan ṭha lo kan ti hle. He lai hmun hi kan pi leh pute luah chin ram Mizoram a ni a, Mizoram chhungah ngei Mizote'n in kan nei thei lo a, ram kan nei thei lo hi a ná kan ti hle. He an dan hman hi siamṭha turin kan ngen a," a ti a; Mizoram sorkar pawh hma la turin an ngen tih a sawi.

MZP President chuan, nasa taka beihna leh dodalna karah Borapansury-ah MZP-in Zofate Chawlbûk an nei tih sawiin, "Zofate Chawlbuk hi Mizote tan a ni a, khualzinte'n an duh phawt chuan riah nante an hmang thei a, an hmang reng tawh a ni," a ti.

CADC chhungah Mizote hmuhsitna leh diriamna a nasa hle tih sawiin L Ramdinliana chuan, "Sorkar aṭanga hamṭhatna kal ṭhin pawh Mizo khaw awmchhunte sem kân an ni ṭhin. Kan missionary-te'n Chakma vauna an tâwk ṭhin a, an quarters sakna tura ram an hawh pawh hnawk an ti tawh hle. Mizoram chhungah ngei missionary-te'n zalên taka rawng an báwl thei lo hi ná kan ti hle a ni," a ti a; missionary-te'n enhranna an tawh a, harsatna an neih thâwm an hriat leh chuan an thlavâng hauh turin MZP an che chhuak dawn tih a sawi.

January 10 vêk khan MZP hruaitute chuan Kurbalovasora khua an tlawh a, V/C-te leh Young Chakma Association (YCA) hruaitute ko khawmin, an khuaah Kristiante an tihduhdah avangin an zilh tih an tarlang. Kurbalubasura khawtlang hruaitu chu missionary-te enhrang lo a, zalen taka rawngbawltir tur leh Chakma foreigner la lut lo turin an hrilh.

MZP hruaitute chuan dan loa khaw din Chandovagarh an tlawh bawk a; he khua hi enfiah nghal turin Mizoram sorkar an tih an sawi. An sawi danin, Chandovagarh-ah hian mi an awm ṭanna a la rei lo a, in 38 awmin, Chakma foreigner deuh vek an ni.