Kuhva káwra thlêng siamna kháwl hawng

Nimin khan Kawnpui Women Farmers’ Club (KWFC) kudamah Kolasib DC Sang­chhin Chinzah chuan kuhva káwr aṭanga thlèng siamna kháwl  Arecanut moulding machine a hawng. Khawl hi ICAR Research Complex for NEH Region, Mizo­ram Centre, Kolasib hnuaia Tribal Sub-Plan kaltlanga pek a ni.

Sangchhin Chinzah chuan, Mizo hmeichhe hlang intêl khawma hmasawn tuma hma an la chu entawntlak a tih thu sawiin, "Zirna, thiamna leh hnathawh kawngah mipate tih theih ang zawng zawng hi tumruhna leh thawhrimna nen chuan hmeichhiate'n kan ti ve thei a ni," a ti a; nu mawhphurhna pawimawhzia te, in chhúng khur enkawlnaah nungchang mawi, aia upa zah nachangte inzirtir fo a pawimawh thu a sawi.

KEFC hian bati, pickle, pa (mushroom) khawi leh ar vulhte an kalpui a, NABARD kaltlangin sumdawnna dawr an nei. Thlêng siamna kháwl dahna tur hian sorkar puihnain kudam sak an tum a ni.