MSU-in in sak mek an ṭhiahtir

Mizo Students Union (MSU) sub-headquarters, Lungsen hruai­tute chuan dan loa khaw din nia sawi, Tuichawngchhuah chu in thar sak belh a awm tih report an dawn avangin January 10, Ningani khan a hmun an tlawh a; in pakhat rel mek chu ṭhiat leh nghal tura an ngen angin, ṭhiah leh nghal a ni.

Lungsen MSU hruaitute hi an president C Laldinsanga leh adviser pahnih hoin Tuichawngchhuahah hian an kal a; Tuichawngchhuah chu Chakma-te'n dan loa an din a nih avangin ṭhiah a nih ngei theih nan MSU-in nasa taka hma a lo lak tawhna a nih thu an tarlang.

Tuichawngchhuah chung­changah Chakma-te High Court-ah an kal avangin High Court-in kut thlak rih lo turin thupek a chhuah tih tarlangin Lungsen MSU chuan, "Hetianga High Court order awmsa MSU lamin kan zawm ṭhat laia Chakma lamte'n ngai pawimawh loa in an sak belh leh hi pawi kan ti tak zet. Dan loa khaw din Tuichawngchhuah hi tihtawp a nih ngei theih nan a tawp thlengin hma kan la dawn a, sokar pawh a ṭul anga hma la thuai turin kan beisei a ni," an ti.

Lungsen MSU chuan, Mizoram chhungah hnam dangte an duhna hmun apianga an inkhuar leh ram leilung hausakna an duh duha an chen ve mai ṭhin chu ṭha lo an tih thu an tarlang bawk.