Blood processing fee atana mamawh tur Budget-ah dah a ni dawn - Health Minister

Health & Family Welfare minister Dr R Lalthangliana chuan, thisen sawngbawlna senso (blood processing fee) atan kum khatah cheng nuai 200-300 vel a sen a ngaih tur thu sawiin, "Sum mamawh tur hi budget session hmasa berah budget-ah khung a ni ang," a ti. 

Thuthar thehdarhtute zawhna chhangin Dr R Lalthangliana chuan, MNF party-in policy an duan SEDP-ah hriselna lam dah pawimawh hmasak a nih thu sawiin, "Mi tam tak sum leh pai lama kan harsat em em laiin natna kan tawhin sum tam tak kan chawi a ngai a ni. Hei hi kan ngai pawimawh khawp a, chuvangin, blood processing fee pawh tihtawp a ni," a ti a; blood processing fee tihtawp chuan MNF-in an manifesto-ah pawh an dah thu a sawi.

Health Minister chuan, blood processing fee atana senso chu sor­karin a pek turin Cabinet-in thutlukna a siam thu sawiin, "Sum a ngai tam dawn fu a, a zat tur chiah chhût theih a ni lo. Department lam kan chhûttir dan chuan, kum khatah cheng nuai 200-300 vel kan mamawh dawn. Sum mamawh tur hi budgest session lo awm turah hian dah a ni ang," a ti.

Dr R Lalthangliana chuan, budget thar hman ṭan hma thla hnih leh a chanve vel la awmah blood processing fee atan eng emaw zat senso a ngai dawn tih sawiin, "Cheng nuai 50 vel chu senso ngai turah kan ngai. Hei pawh hi sum awm sa pawt khawmin, kalpui nghal mai ila, kan ti a ni," a ti a; mi harsa zawkte'n thisen an hmanah sum sen ngai tawh loa sorkarin a tumsak tura thutlukna siam a nih tâk avangin Chief Minister chungah a lawm thu a sawi.

SEDP hnuaiah so­cial security an dah pawi­mawh thu sawiin Dr R Lalthangliana chuan, "Hemi hnuaia health care scheme kalpui dan tur pawh tih tak zeta ngaihtuah a ngai dawn. MNF sorkar hmasak khan health care scheme hi lo ruahman a ni a, sorkar hma khan a kalpui nawk nawk a, amaherawhchu, harsatna tam tak karah duhthu a sâm lo tih sawite a awm a, tunah kan ennawn leh a ngai dawn a ni," a ti.

Health Minister chuan, health care scheme kalpui mek ang chuan, private hospital tan kalpui a harsat tur thu sawiin, "Private hos­pital-a thuneitute nen inhmuhkhawm thuai tum a ni a, ṭha taka kalpui theih a nih theihna atan theihtawp chhuah a ni ang. A bik takin mirethei harsa zawkte kan damloh níkhuaa senso tam tak ngai ta ṭhin hi kan tlin loh avangin thihna kan hmachhawn fo ṭhin a, hei hi chhâwk theih kan inbeisei," a ti a; health care scheme chu vawi leh khata tihfel rum rum theih a nih loh thu a sawi.

Sorakr lapuiin health care scheme a duan tharte pawh hman ṭangkai dan tur an ngaihtuah tur thu sawiin R Lalthang-liana chuan, "Mizorama damdawi-inte nen inmil taka kal dan tur kawng hi rilruah a awm lo thei lo. Fím taka ngaihtuahna sêng a, uluk taka health care scheme hi kalpui a ni ang," a ti.